陸 羽 仁 (18/03/2008): 狂香港提款機

港股經歷「黑色星期一」，昨早美國突然宣佈減貼現率0.25厘，摩根大通亦宣佈全面收購美國第五大證券行貝爾斯登，但這些消息無助穩定大市，恒指低開919點，下跌低見21,041點，跌近1,200點，後來反彈上21,473點，將跌幅收窄至764點，但大市下午再回插，收報21,085點，跌1,152點，以近全日低位收市。期指在現貨收市後反彈，收報21,336點，跌幅收窄796點，比現貨高水251點，期指成交76,639張。國指跌854點，報11,037點，大市成交944億元。
美國聯儲局上周五出資支持貝爾斯登後，深怕亞洲股市昨日開市頂唔順又有大行出事的壞消息，所以在周末都力促摩根大通敲定收購貝爾斯登的方案，並由聯儲局借300億美元支持交易。聯儲局更在緊急會議決定先減貼現率0.25厘（聯儲局借錢給銀行的利率），唔等明天開會才減息。
港股跌幅亞洲之冠
雖然聯儲局連番出手，但都頂唔住亞洲股市的跌勢，因為美國的大動作令日圓再度急升，在亞洲市好快就升穿97日圓大關，日股都帶頭大插。咁又係，美國衰累街坊，日圓咁升法若果停唔到，一兩個月就會升到95年79.75圓的歷史高位，以日本咁倚重出口的經濟，高匯價意味經濟災難將會來臨，股市唔跌就奇。
不過更奇的是港股昨日跌幅高達5.2%，比日經指數的跌幅3.7%還要大得多，新加坡股市只跌1.6%，上證綜指亦只跌3.6%，港股在跌幅就個亞洲冠軍。
陸羽仁和中環茶友傾開此事，他們異口同聲話，港股流通最好，外圍有大件事時，好多基金要沽貨套現，應付續回，所以要沽就沽港股先，因為港股易沽，就好似提款機咁，有事就先來提錢。
我昨天見咁多芬佬沽貨，都好同意這個流通性好的理論，但日本股市咁大，應該比港股流通性更好，加上日股深受圓匯升值打擊，雖然係較穩定的大股市，港股無理由跌多咁多。或者提款機還有深一層意義，港股不受本身經濟因素左右，非常好炒，所以升又升得誇，插又可以插深，兩邊搵食的水位都深，你睇期指尾段又急抽幾百點，都唔知蠱惑仔想做乜。上星期五期指收市插得多，昨日期指收市又彈得多，證明好多古惑仔在期指尾市搵食也。
美股在懸崖邊漫步，唔係崩潰，就係慢慢穩定，聯儲局主席伯南克和財長保爾森救市救到面青，問題都係「信心」兩個字，若連番行動不能恢復市場信心，美股經濟和股市再跳崖，全世界都要陪葬。若能恢復番少少信心，跌咁多又應該要彈。
早前嚴格執行止蝕的股民，輸錢斬倉，而家仲有錢執平貨，早前無止蝕，而家就坐艇出大西洋。昨日狂插的股份比比皆是，不少都跌10%過外，例如信置（083）[股價及相關新聞] 就跌11%，市場不單覺得美國大減息香港跟唔足，還怕樓市都跟住受影響，較進取的信置就要捱沽。其他仲有好多大跌股，例如中電信（728）[股價及相關新聞] 插10.1%，中遠太平洋（1199）[股價及相關新聞] 插11.6%，財險（2328）[股價及相關新聞] 跌11.5%。
洗倉股宜沽不宜撈
有些之前升得高的股份，業績好又大跌，業績差也大跌，物業代理美聯（1200）[股價及相關新聞] 公佈，07年全年純利6.5億元，較06年度同期的1.5億元，大幅增長3.4倍，但高業績支持唔到股價，亦急挫13.4%。美聯近日跌勢好急，由今年1月9日的高位15.28元，跌到昨日只有6.9元。
業績好都係咁，業績差更大鑊，玖龍紙業（2689）[股價及相關新聞] 公佈中期盈利只升11%，毛利率下降，業績公布後遭基金洗倉，重挫40.28%，同行理文造紙（2314）[股價及相關新聞] 亦被波及，重挫26.8%。紙業兩大成本廢紙及它們自行發電用的煤都急漲，紙業股仲有排捱，持有股份遇上急跌，要斬倉而唔係撈底。好似美國貝爾斯登在上周四股價仲有57美元，到上周五跌到30美元，股東唔斬倉，結果被摩根大通以每股2美元收購，輸到眼淚流。
如此波動的市況，平股雖多，但讀者若成手蟹貨者，唔好再溝。無乜貨大把錢想買股票，買得貨要預守2、3年，因為你問伯南克和保爾森救唔救到美國個市，他們都無十足把握答你。
<<轉載自香港經濟日報>>