陸 羽 仁 - 金 融 High Tea (11/11/2008):阿爺重手拉住墮崖馬車

中央四萬億救市方案的刺激，不止拉起中港股市，連油價都扯高埋。恆指昨日裂口高開，上破15,000點大關，早段一度上升超過900點，升上 15,148點，之後走勢回軟，升幅收窄至全日最低的14,454點，只升210點，下午又彈，反覆上落，在14,800點上下爭持，恆指收市報 14,745點，升501點，升幅3.5%。期指收市報14,737點，升537點，低水8點。國企指數仲厲害，收市報7,413點，上揚618點，勁升 9.1%，全日大市成交增加至607億元。

內地股市升得更急，上證綜指最高昇到1876點，收盤報1874點，大漲7.3%，升幅高過港股。

阿爺這個龐大救市方案火速上馬，皆因內地經濟真係有下滑跡象，高人話阿爺若不出重招，明年內地經濟增長有可能跌到6%。依家呢4萬億救市計劃，中央直接出 錢約為1萬億，其餘3萬億係帶動出來的投資，中央兩個月都唔等，昨日已召集了各省市領導開會，年底前中央先投放1000億元，按比例加埋帶動投資，今年內 先投4000億元，會對今年第四季的GDP產生效應。

好淡劇鬥隊住滙控

阿爺想到2010年底共投放4萬億，未來兩年差不多每年有2萬億投入經濟內，估計2008年中國GDP總量有27萬億元，新增2萬億元等如GDP的 7.4%，就算只計政府每年直接新增投資的金額都有近5000億元，都等如GDP的1.9%，所以即使明年本來GDP增長只有6%，加埋新增投資，都有 8%以上。記住內地唔同香港，香港講來講去幾年都唔動工，內地一講就做，唔使擔心啲錢唔按計劃使。

阿爺推出這個4萬億大計，就如拉住一架快要墮崖的馬車一樣，可以夾硬拉停佢的跌勢。只要阿爺維持經濟增長，就係一個強大的穩定因素，香港經濟跌極都有個譜。

中環茶友話，阿爺突然出手，未必在股市大戶意料之中，所以昨日都見到好淡爭持得幾劇烈，大市升幅一度收窄到210點，當然其中一個因素係滙控(005)無升，但亦不排除好淡各有捧場客，所以有劇鬥。

陸羽仁自己本來最擔心連內地經濟都唔掂，咁香港就好易陷入無底深跌中，今次阿爺咁大力出手，內地經濟應該無事，咁樣就減少一種風險，令中長線睇法可以樂觀番少少。但依家最大問題係唔知美國跌完未，怕佢明年第一季再插，但以短線計，有助港股繼續反彈。

睇番昨日個市，紅籌國企股份直接受惠，紅籌成份股除了聯想(992)逆市勁挫13.5%、中國電力(2380)及中遠洋(1919)微跌外，全線股份上 升；而國企成份股方面，除中通服(552)及青島啤(168)齊跌1%外，所有股份都報捷，由於救市資源投放有近六成會集中在基建上面，基建、建材及金融 類股份，成推動港股上升的火車頭，中國建材(3323)狂飆42%、亞洲水泥(743)急漲36%、中材股份(1893)大升35%、海螺水泥(914) 猛漲 31%、馬鋼(323)狂升35%、鞍鋼(347)大漲27%、中鋁(2600)亦大升一成九！

紅色股淡倉急斬

基建類股份方面，中交建(1800)急升23%、中鐵建(1186)大升20%、而中國中鐵(390)亦猛漲18%。

中環茶友話，一日昇三、四成的股份，好可能積咗唔少淡倉，一爆4萬億方案出來，淡倉要急急斬，才有這種升幅。散戶喺佢升咁急時追，小心急升完要回吐。

滙控股價昨日反覆偏軟，收市報92.3元，微升0.3%。滙控收市後公佈，旗下美國滙豐銀行第三季盈轉虧1.36億美元，去年同期則賺2100萬美元，稅 前盈利1.88億美元，期內淨利息收入增至11.69億美元，去年同期為9.23億美元。美國滙豐受撇帳拖累才要蝕錢，第三季美國個人理財業務貸款減值準 備為43億美元，比今年第二季撇帳增加7億美元，主要是因消費借貸、房地產抵押組合，以及信用卡組合的貸款損失準備均有上升。

老實講，美國滙豐條數雖然唔係靚，但第三季蝕1.36億美元，即係10.6億港元，叫做無驚人撇帳，條數滙控應該都頂得起。後市浮沉，除了睇內地外，還要看滙控公佈美國業績後的走勢。

<<轉載自香港經濟日報>>