陸 羽 仁 (20/02/2008): 美股大彈 港股小彈

美國減息帶動華爾街股市造好，加上內地股市反彈，港股終於出現較像樣反彈，恒指見22,192點後升幅慢慢縮窄，收報21,867點，升幅由七百多點減至482點；國企指數亦升幅收窄至364點，報11,439點，大市成交987億元，動力依然不足夠。期指收報21,641點，升幅收窄至161點，比現貨低水226點，成交89,635張。
聯邦儲備局主席伯南克連環出招，先是注資包底挽救大行貝爾斯登，跟住又減息四分三厘，減息幅度宣佈後，華爾街股市升幅一度收窄，但跟住又上番，結果上升420點收市。內地人行上調存款準備金率0.5個百分點至新高的15.5%，但市場演繹為加完存款準備金後、未必會再在短期內加利息，內地股市因此反彈，滬綜指報收3761點，漲92點或2.5%，但比昨日最大漲幅接近4%已明顯大幅收窄；深成指受第一權重地產股萬科大幅上漲後企穩支持，升幅大大超過上海，報收13,044點，漲4.5%，兩市成交額共計1,360億人民幣。
雖然中美股市向好，但市場觀望氣氛仍然濃厚，特別是內地股市，股民認為升勢全日衝高回落，根本未見有實質利好消息出台，前兩日托市的中石油（857）[股價及相關新聞] 領頭回落，若不是收盤前中石油止跌回穩，指數根本難以較大漲幅收市。
資金流緊要過基本因素
港股近日身不由己，跟隨外圍波動，但波動之餘，出現升就升得少過人，跌就跌得多過人，好似美國減息前後，杜指扯上扯落，結果又係彈番上去萬二點樓上，基本上無跌過，但港股跌多升少，恒指變成在兩萬二千點水平浮沉，係咁意都少成千點，有中環茶友話，港元同美元掛，恒指由三萬二千點高位回落，足足跌去成萬點，加上美元貶值，歐洲投資者若高位買港股，蝕完匯水貶股價，真係慘過遇上股災。但全球股市震央，明明是在美國，香港無論樓市同經濟，點睇都好過美國，港股要跌得多過美股，真係無天理。
陸羽仁聽到茶友咁講，笑笑口話炒股不同買菜，買半斤就會有八，大行睇股市目標價，今日可以話三萬，明日又話調整到一萬八，除了用公司盈利同派息做理由去解釋外，最重要係睇資金流向。香港股市大部份都係由外資操作，熱錢流入時估值可以調高，熱錢流出時當然就會質低，散戶跟大戶炒股，今日話盈利增長快，調高估值同目標價，散戶有錢賺咪跟住高高興興去掃貨，問心句係咪真係看好前景諗住長？抑或係諗住大行推高自己炒埋一份呢？相信好多散戶的答案，可能開始時係睇盈利前景，但當個市炒炒愈炒愈高後，大部份人都變係後者，只係跟住大行目標價去炒，所謂基本分析只係為炒作提供一個理由而已，最弊係老散到個市下跌，成手股票變蟹貨時，就真係信自己買股係為睇好公司前景，死都唔肯止蝕，結果蝕到入肉。
女股神「燉冬菇」有啟示
呢一輪跌市中，港股差過美股，表面睇並不合理，但諗真舊年港股升得勁過美股時，點解大家又無話不合理呢？說到最後，港股雖然跟住中美股市走，但熱錢只係把香港作為一個炒作場地，而不是大本營，所以當大本營無事時，熱錢走出來炒作，港股可以升得好勁，到外資大本營有事時，外資班水救亡，掟起港股上來，可以話一感情都無。有投資銀行界老友好坦白咁講，一年前華爾街大行手頭大把錢，四出搵炒，現在大行紛紛出事，就算唔死都一身潺，避得過賣盤，都避唔過大手撇帳，活動能力大減，好多搵炒的投資銀行家，都已經收大信封，連睇好美股聞名的女股神科恩，都話要「燉冬菇」，無班大鱷興風作浪，老散仲係睇住公司盤數，話股價應該值幾多，又係咪有多少天真同呢？
港股幾十年來大起大落，三兩年走一轉，每次形態都不同，但萬變不離其中，都係由過江大鱷掀動潮起潮落，明白這個道理，就解釋到點解港股會跌得多過美股，香港的老散知道自己的位置企係邊度，就會明白自己係借個場出來俾人做莊，最聰明的做法係有人的時候等人炒作，自己跟風博賺番多少當收場租，到曲終人散再無人，股價殘晒之時，平平咪自己執番多少貨等下個浪，呢個策略咪叫做人棄我取囉。
<<轉載自香港經濟日報>>