陸 羽 仁 (26/03/2008): 聽聯儲局話炒番轉

復活節假期，美國先過香港開市，乘住華爾街股市大幅反彈，恒指高開七百點後一直造好，下午升幅擴大，收市報22,464點，升1356點，成交略為增加至1005億。即月期指高水35 點，報22,500點，勁升1679點。國企指數報11,727 點，升890點。
美股造好，港股本來受內地股市下跌影響，好友未敢放膽進攻，但跟住內地股市亦受外圍帶動回升，滬綜指報收3629點，微漲3點，深成指報收13427點，漲329點或2.5%，兩市成交額共計1,161億元民幣。從昨日上海股市比較弱，龍頭中石油仍見壓力，內地股市反彈力度仍宜觀望。
十個散戶九個半沽貨
港股今次升幅強勁，暫時見不到好清楚理由，但從散戶指數睇，就完全合晒「合尺」，昨日上午個市開始升時，經紀張打電話來，話做十五個柯單，有十四個係沽盤，可見散戶輸到心慌，個價一好就出貨，結果個市應聲反彈一路夾上。
個市彈得勁，但究竟係咪已經轉勢呢？從買盤睇，似乎現在入市者，大部份都係實力強手買來長線投資，或者基金補倉盤，這些買盤不是技術性入市，就係吼低位先入貨，所以個市繼續彈上去，去到咁上下，可能買盤就未必會跟進，尤其美股彈彈，已經彈到幾高，所以短炒者要隨機應變，唔可以死牛一邊頸。
陸羽仁昨日話，近日個市造淡友好似順風順水，但去到呢個水平，做淡都有相當風險，話口未完，港股就借住美股反彈，大幅推高成千點，淡友見好不收，即時就被人摑一大巴，正如中環茶友話，今時今日，做好友淡友都不易，皆因大市由偏高回落，慢慢進入一個均衡狀況，即係話好淡力量趨向接近，沒有一方可以穩操勝券，就算個市會再跌，但短期一記後抽，淡友若然走避不及被抽中，都可以好傷，所以無論點睇個市，都唔可以再貪心。
茶友話，現在無論中美，都有好濃厚政策市的味道，美國為免衰退長期化，大力出招干預，先是大幅減息，繼而為貝爾斯登包底，央行為私人投資銀行埋單睇數，好有叫人放膽炒的味道，結果不單美股大升，風波主角的貝爾斯登，賣價由原來賤售的兩美元，急速反彈為「高價」十美元，雖然買家摩根大通是印股票收購，但點講都係大幅加價，低位博反彈的炒家，今番認真「和味過和味龍」。
今次貝爾斯登賣盤，是金融市場轉移財富的經典教材，茶友話，聯儲局今個月開會前，突然宣佈為貝爾斯登包底，消息公佈當日，貝爾斯登仍然造緊三十幾美元一股，當時茶友已覺得好奇怪，因為政府用得公帑拯救，即係話家公司應該接近崩潰啦，咁每股仲點值三十幾美元一股呢？尤其有了英國北岩(Northern Rock)做辦，北岩初初出事，英國政府大力拉線，想出位大亨布蘭森收購，但結果價錢拗唔掂，最後要國有化，北岩股票形同廢紙，有例可援下，三十幾美元一股的貝爾斯登有人買，小股東點解唔收錢先？
強者靠投機撈粗
果然，隔一日收購底牌揭盅，開出來話一股作價兩美元，呢個時候貝爾斯登股價急插水，但好奇怪係狂插之餘，股價從來無跌到去兩美元咁低，最多只係三個幾美元，多出的個幾美元，用金融界術唔，就係投機性價值(speculative value)，買家係博收購要加價，當時高價無套現，後來嚇到面青不計價沽貨者，變成被人打完一巴又一巴，夠膽低買者就撈了粗。
茶友話，貝爾斯登的例子說明了兩件事，第一件係金融世界係弱肉強食，強者未必係多錢者，而係掌握資訊同知識者，現在股市遊戲規則係有大鑊照買賣，結果係有內幕消息者或豐富投資常識者，毋須預先偷步，憑住對交易的理解，已經可以盡佔先機，以前有重大交易上市公司要停牌，老散唔明仲可以問經紀，現在打得電話問得人，個價已經插落，所以好似貝爾斯登交易呢錢睇落好易賺，實情係老散無得恨，皆因北岩同貝爾斯登兩家公司，下場可以好唔同，老散無獨特資訊又點識分呢？強者根本就可以合法打你荷包。
第二件說明的事，係投資要聽中央銀行話，特別係最有權力的聯邦儲備局，呢個講法長期靈唔靈唔敢包，但短期就可以話靈多過唔靈。好似今次聯儲局包底，擺明係鼓勵大家炒作，怕大家不敢炒作，個市就會塌下來，敢聽聯儲局話者，咪賺到一浸錢，做淡者見好不收，咪暫時要養住傷先囉。

<<轉載自香港經濟日報>>