陸 羽 仁 - 金 融 High Tea (03/11/2008): 股災重溫

港股在10月度過了一個驚魂股災月，歷史上的股災好多都在10月發生，例如87年的股災、97年的金融風暴等等，記得去年人人怕10月有災，點知10月唔跌，11月開始急回；今年人人見之前已經跌咁多，無人話10月有災，點知10月就來一個大災。

恆指由9月尾的18016點，跌到上週五收市價13,968點，一個月埋單跌了4,048點，呢個上週五收價已從10月27日的低位10,676點大幅反彈了3,292點，但仍然唔見咗22%咁多，認真得人驚。

上週五港股跌361點，跌幅2.5%，而美股亦繼續反彈，杜指升1.6%，升上9325點。美股呢個月埋單唔見咗17%，略優於港股，不過都重傷啦。

百年一遇超 越平均

記得個多月前，有一次去健身玩跑步機時，一路跑一路睇電視報導，有家美資大行話，美國跌市平均跌1年左右，由去年10月高位跌到今年9月，就跌足1年，佢 估美股好快會見底，港股亦好快會見底咁話。我當時一邊跑步一邊諗，股災跌1年係平均數，所謂平均跌幾多，即係有時跌得多，有時跌得少，拉勻出來的結果，但 今次金融海嘯係百年一遇的金融危機，點解呢家美資行會估個市只跌平均下跌的時間，而唔係跌較長的時間呢？咁大危機只搵啲一般股災平均數據來參考，似乎搵錯 參考基數。

我估依家大家都關心港股見底未，或許可以睇嚇現代較巨型股災的下跌情況，73年股災係最好的例子。香港的現代股市在60年代末才起步，但到72年中下段開 始暴升，72年12月恆指仍是700多點，但牛市尾段升幅最驚人，到73年3月9日昇上1,774點的高位，即是短短4個月指數升了1倍幾，這就是香港老 股民常常講的「千七點」的時代。

不過升得癲也跌得癲，跌市由發現合和的假股票開始，在短短一個月內已跌了800多點，恆指跌番落900多點的水平，災情相當嚴重。到73年10月更遇上全 球性的石油危機，埃及和敍利亞聯手突擊以色列，為第4次中東戰爭揭開序幕，美國因為支持以色列，被阿拉伯國家為首的石油輸出國組織報復，聯手對西方國家實 施石油禁運，油價暴升，全球股市就跌入深谷中。

73股災跌 足兩年

港股在73年的跌浪中雖有反彈，但彈完又再插，恆指終於在74年12月10日插到低位150點，恆指從高位跌了92%，跌市持續了1年零9個月，下跌的時 間和深度都十分驚人。不過大家可以咁睇，73年香港股市初起步，未見過大場面，所以牛市時股份全部亂咁炒，這是典型的第三世界股市，升得癲才會跌得咁狂， 相信現代股市都好難跌92%，咁講又啱，或者又睇嚇73年美國的跌市。

73年港股的大牛市，都有國際背景，但當年資訊不發達，香港普通股民根本唔知美國發生乜事。美國總統尼克遜在1971年取消美國的金本位制，從此美國發鈔 不再需要有黃金儲備支持，此舉目的是徹底解脫美國發鈔限制，可以無限量發鈔和借債，以擴張性的貨幣和財政政策，催谷繁榮。尼克遜這一招果然收效，但谷出繁 榮的同時，因為貨幣供應量大大增加，亦谷出泡沫，美股一枝箭咁升，杜指大升了年幾，終於1973年1月到頂，從1051點高點開始回落。

美股在73年1月開始跌，港股還喪炒了兩個月到73年3月，當年大家唔識，以為假股票累死股市，我就有少少懷疑，港股當時亦係慢慢跟外圍，美股回落後，對外圍有瞭解的鬼佬知道環球股市大勢開始唔掂，就進一步推高港股派貨畀散戶接。

美股隨後一直跌，到73年10月開始遇上石油危機，更雪上加霜，急插而下，直至1974年12月杜指跌至577點的階段性低點，跌幅高達45%，美股到底的時間就和港股同步了。

持續一年負 增長

美股在這個現代漫長跌市中，跌了接近兩年，指數損失近半，以一個成熟經濟的股市計，確屬重傷。香港股市當年的92%驚人跌幅，主要因為當時仍時一個第三世界式的股市，現代香港股市應該不會跌到那種田地啦。

又睇睇在美國股市下跌的同時，美國經濟發生乜事。在1973年一季度，美國本地生產總值(GDP)增長達到10.6%，是一個驚人高點，難怪股市在同期1 月衝上高位，隨後GDP開始下降，到 1973年三季第一次出現負數，但第四季又回覆正數，到1974年再跌入負數，74年第一季、三季、四季以及1975年一季均出現負增長。

今次美股牛市的終結亦和70年代時一樣，GDP增長和美股同步見頂。美國2007年第三季經濟增長衝上4.9%的高位，杜指亦在同期7月首次衝上 14000點的高位，後來見頂回落，次按危機浮現，令聯儲局在9月開始減息，刺激美股10月再上14,000點，造出一個雙頂，結束這個牛市。

73年時美國經濟開始負增長的季度後，又在73年第4季回覆正增長，然後才再跌入負數。今次美國GDP在去年第四季錄得負0.2%的減縮後，也在今年第 一、二季再錄得正增長，然後才在第三季再跌入負0.3%減縮。73年第二段的負增長維持了一年加一季，如果今次美國經濟連續負增長一年以上，都要衰到明年 第三季，以今次美國的跌勢，維持連續幾季甚至一年負增長不足為奇。

股市走前三個月

股市比經濟走前三個月到六個月，70年代美國的跌市在74年12月見底，但經濟在75年第一季仍是負數，所以股市走前了三個月插到底。所以假設美國經濟要跌到明年年中以後，股市到明年初仍可能有得插。

你可能會問，到底美國經濟在 70年代差還是現在差，當年是泡沫爆煲再遇上石油危機，所以才爆出這種大鑊，在70年代的衰退中，美國通脹率(CPI)從1972年末開始上升，到 1974年末高達12.3%，因為油價不因經濟衰退下跌，因為禁運的國際政治因素高居不下，美國當時是陷入不受控停滯膨脹中。從這個角度，今次衰退令油價 急回，美國的通脹率急跌，所以美國經濟只受衰退打擊，無受通脹和衰退雙重打擊，可以全力減息救經濟。不過今次金融業的核心溶解，也是70年代所沒有，大鑊 一個又一個排隊上，美國住宅樓急插緊，但商業樓又開始跌，揸重商廈物業的保險公司危危乎；次按未爆曬，又到信用卡還款爆鑊，諗起都令人頭痛，在這個百年一 遇的金融危機中，雖然話現代經濟在擴張性貨幣政策下恢復得更快，但今次衰退會唔會短過 73年好多，亦真係無把握。

我估港股大體上脫離唔到美股的大勢，但金融風暴由美國吹向歐洲、亞洲，本地公司的爆煲潮今年底明年初會上高潮，仍不排除美股稍定，但港股企唔定，短期雖會反彈，只怕反彈過後，又再滑向低位。這種市況，暫時未宜瞓身也。

<<轉載自香港經濟日報>>