陸 羽 仁 - 金 融 High Tea (12/11/2008):上下浮沉繼續換馬

受美股低收同獲利回吐影響，恒指低開422點，其後在中資股帶動下，一度倒升至14,853，下午再反覆回落收報14,040點，跌703點；國企指數亦 在下午回落，收市跌275點，報7,136點，大市成交544億元；期指收報13,970，比現貨低水70點，成交96,760張。

個市急升急跌，中環茶友問點睇，陸羽仁話，若然從外圍睇，美股升破九千點後，前晚先升後回，個勢唔算有力，照理香港應該係要調整，但港股開市仲幾硬淨，到下午先至插落嚟，近排港股下午走勢，好多時反映美股開市表現，照睇美股有可能會回軟，所以尾市就插得比較急。

從外圍走勢，港股回軟係正常，若果從大戶盤路去估，通常大戶無論造好造淡，多數都係下旬至發力，現在剛剛開波，無需要咁早就決定炒上定炒落，恒指升上萬五 點之後，同低位比升了三成，向上空間唔多，向下大插，但想沽貨的早已經沽咗，又未係時候，所以最大機會係玩吓自由浮動，上上落落，換吓馬。

大量股份搶有限資金

由於市場氣氛主要炒中央管理層救市，吸引短炒資金，其他股份好易失寵，好似本地銀行股恒生(011)軟5%，再度失守紅底股；中銀香港(2388)吐 8%；東亞(023)跌6%。雖然大小銀行先後減息，但不代表估價足及審批轉寬鬆，下午地產股跌幅擴大，長實(001)跌9%；恒地(012)跌8%；新 地 (016)跌5%；新世界發展(017)及信置(083)跌7%及9%。

另一隻大市領跌股係滙豐，大笨象發表美國第三季業績，初時市場反應係好過預期，但跟住好多大行唱淡，好似高盛發表報告，指滙豐控股旗下美國滙豐銀行及滙豐 融資第三季業績明顯較該行預期差，加上前景存隱憂，因此正檢討其評級、目標價及每股盈利預測。陸羽仁認為，唱好唱淡都只係大行觀點，實情係現在市場資金有 限，大家只係將有限籌碼換來換去，若果要買一隻股，自然就要沽一隻股，道理就係咁簡單，這也是可見將來大市的主調。

昨日澳門特首宣讀《施政報告》，又有一系列紓困措施，全世界政府現在都要放水救火，澳門亦無例外，中環茶友話，澳門今年真係內外夾攻，先係中央控制內地人 到澳門旅遊，篤爆了賭業的大泡泡，跟住又到金融海嘯，可以話兩面受敵，三個澳門賭業主要經營商中，最傷梗係金沙老闆艾德森，現在母公司出現融資困難，澳門 項目面臨停工，有消息話集團仲考慮放售資產減債。

艾德森今次做過江龍，被困濠江，原因五個字可以講晒，就係「貪勝不知輸」，金沙攞到澳門賭牌後，搶先開檔，飲了頭啖湯，發覺好好味，於是大力添飲，而且不單止喺澳門狂飲，仲喺新加坡狂飲，結果消化不良，現在隨時滯死。

賭業爆煲金沙頭痕

有澳門賭業猛人同陸羽仁講，艾德森係今年初仲係意氣風發，當時澳門政府叫停項目，要大家重新分配賭枱，金沙當時提出，話應該以投資額作為劃分勢力的準則， 即係揼錢愈多，佔的市場份額就愈大，當時他心諗自己有成千億投資項目在手，今次仲唔做梗澳門一哥，點知忽然間阿爺限制內地人去澳門，成個市即係窒晒，跟住 金融海嘯爆發，原本支持他的基金個個喊莫財，艾德森在亞洲東征西討的計劃，主要係靠吹出一個發亞洲財的神話，吸引基金支持，但私募基金乾塘，抽水大計難 產，跟住連商業票據市場都一片緊張，原本金沙用票據籌集短綫融資的渠道又阻塞埋，個檔攤愈搞愈難，所以出事已在預料之內。

賭業猛人話，艾德森開了澳門條水喉，兩、三年間就由不見經傳跳升為全球第三的富豪，排名僅在巴菲特同蓋茲之後，如果澳門同新加坡檔生意再谷勁啲，隨時成為 全球首富，做得超級富豪個個都係要威，股神同蓋茲一老一少霸住個富豪榜十幾年，艾德森忽然間有機會過佢地頭，你話個心點會唔雄呢？結果就咁一舖躀低囉！

講完咁耐，陸羽仁只有一個好現實的問題，就係濠賭股是否從此玩完唔使睇，又或者係趁低吸納的時間呢？猛人話又得又唔得，你話得，但現在澳門賭業真係供過於 求，無可能好就好，濠賭股就算平，但前景認真差；你話唔得，但照計澳門係中國特區，又係境內至今唯一領正牌可以搞博彩業的地方，無理由永遠都係前景一片黑 暗啫，所以話要買濠賭股，謹記兩件事，一係不宜心急；二係要有坐貨實力，吼到低位坐得幾年，收穫可能好大都唔奇。

<<轉載自頭條日報>>