陸 羽 仁 - 金 融 High Tea (18/11/2008): 趁你病攞你命

周日，在華盛頓召開G20會議結束，但未有具體利好政策出台。美股上周五雖大跌，但受國家注資部份國企的利好消息刺激，內地股市低開後全面上揚，滬指更重 上2,000點水準，收報2.030點。香港股市卻未有跟隨內地股市走勢，恒指高開67點後即掉頭回落，最低跌至13,277點後反彈，最高報 13,738點後回調。恒指收市報13,530點，微跌13點或0.1%；國企指數收市報6,968點，跌54點。全日大市成交量縮細，只有398億。期 指收報13,461點，跌121點，低水69點。

龍頭股滙控(005)旗下滙豐馬爾他銀行公佈季度簡報，核心收入及盈利水準仍然令人滿意，該行又透露，已發行3000萬歐羅次級債券，以支持未來業務增 長。不過股價未曾受惠，滙控股價曾一度下試80元報80.05元，收市報81.95元，拖動大市向下。市傳滙控正「非正式」研究處理滙豐融資方案，包括分 拆或三年內出售。

內地股市上升，中資股未能受惠，「三保六行」除中行 (3988)升1%外，其餘均跑輸大市，招行(3968)因未能成功染藍，投資者獲利回吐，收市下跌4.1%。反而報道指包括中國東航及南航將於近期分別 獲得國家30億的注資行動。受利好刺激影響，南航(1055)及東航(670)分別大漲12%及7.6%；國航(753)則上升2.5%。

大行唱淡港交所生意

港交所(388)近日成為大行唱衰焦點，大摩最新又發表研究報告，預計港股09年每日平均成交額將下跌超過四成，因此維持港交所減持評級，目標價由75元大削五成至38元。剛好昨日港股成交跌至近日新低，大摩呢腳踩得好應，股價應聲急跌。

報告指出，雖然港交所的成本預計將會維持現水平，但由於市場活動疲弱，令該公司的收入來源減少，預計港股每日平均成交額將下跌42%至470億元；大摩續 稱，470億元已屬比較樂觀的成交額預測，指港股的成交額甚至有機會跌至每日150億元，相等於04年至05年的水平。以港交所現價約為09年預測市盈率 23倍，相對以往及同業的市盈率水平，估值仍屬於偏高。

港股昨日交投是否好低呢？講真見仁見智而已，以恒生指數由三萬二千點跌到去萬四點，即係跌了五成半，等如恒指成分股減了一半價，換算起來昨日近四百億交投 數量，等如三萬點樓上有700、800億元成交，如果話熊市三期買賣兩閒，現時港股仲未去到呢個程度，所以大摩話成交見150億聽落比較誇張，但係現水平 再跌，就一啲都唔出奇！

對於港交所股價，陸羽仁早就認為偏高，不過，最近大行分別發出報告唱淡，而且一次比一次目標價低，大合奏動作太過明顯，咁講唔係話唔應該睇淡港交所前景，而係應該一早睇到，唔應該等到今日先至出嚟講，一於趁你病、攞你命。

中環茶友話，港交所係投行發Accumulator的熱門對象，去年十月大市最熱時，好多人都接咗貨，嗰時投行用大市成交可以升到去一日千二億作為預測基 礎，睇股價可以升到280元，有極度樂觀派睇500元，當時無分析員會出嚟預測，大市交投有上有落，港交所股價應該反映股市係有循環景氣的因素，情形一如 今日大行愈睇愈淡，當市場情緒轉向悲觀，股價一浪低於一浪，買咗Accumulator者，真係接貨接到手軟。

廠商面對無 單煩惱

由於港交所高位係去年，如果用一年期計，Accumulator合約應該陸續到期，所以早前有分析話拋售壓力應該慢慢減低。不過，Accu- mulator 年期無定，有人做半年、有人做一年，亦有人做兩年，所以好難準確咁講合約到期日係幾時，最重要係大戶究竟係咪想咁快就收手，照近日大戶動向嚟睇，大戶係咪 想踩多呢隻股份一腳先收夠籌呢？

收市後，內地宣佈暫停調整最低工資政策，內地推出勞動合同法，加強保障工友利益，令廠商成本大增，好多廠商叫苦連天，現在因應形勢調整改革工人福利步伐， 但廠商問題亦由面對成本上升，變成接單不足，現在成本上升的壓力紓緩，只係減輕痛楚，今個聖誕節海外零售商訂貨極之保守，睇緊來年情況仲未見曙光，對無單 的廠商來講，問題依然未解決，所以這個消息，主要反映中央明白企業面對的困境，實際作用暫時有限。

<<轉載自頭條日報>>