陸 羽 仁 - 金 融 High Tea (24/11/2008): 股神都領嘢

港股上周五超前炒美股反彈，恒指低開484點見11,815點後急升，收報12,659點，不跌反升360點。美股上周五果然交足功課，成日呆在低位，但 最後一個鐘頭急抽超高500點，杜指收市大升494點，收報8046點，升幅高達6.3%，皆因傳出候任總統奧巴馬會搵紐約儲備銀行行長格林納 (TimothyGeithner)做新任財長，市場就借此消息大幅反彈。

美股上個星期大插，今年至今已跌咗46%，是1931年以來最差的一年，單係睇一隻花旗集團的股價，已令人膽戰心驚。雖然上周五美股大幅反彈，但花旗股價 再跌20%，跌到3.77美元一股，總市值得番205億美元，即係1602億港元，你可能唔明呢個數字係乜概念，即係話香港的恒生銀行(011)雖然呢兩 月來跌咗咁多，但市值仍有1703億港元，即係恒生的市值大過花旗！

恒生大過花旗

花旗曾經是美國第一、世界第一大的銀行，估唔到如今淪落到咁嘅田地。唔好講兩年前，即使過去一年內，佢的股價高位亦有35.29美元，如今得番10分之 1，佢依家仲有1萬億美元資產，點解市值跌到只得番205億美元？呢個價明顯係執笠價，市場擔心佢啲問題資產未充足撥備，有好高的隱藏負債，所以真實情況 係負資產，無人注資打救佢就會執笠，但過去認購銀行股注資的投資者全部焦頭爛額，實在搵唔到街外人注資，唯一可能的是找美國政府入股，政府入股後持有大量 新股，會將現有股權大幅攤薄，所以股東掟貨都掟唔切了。

過去市場曾經高高興興地去炒這些「政府打救股」，但很快發覺，政府入完股後都無乜好下場。以美國國際集團(AIG)為例，美國政府入股前跌到2個幾美元， 好多人話「抵買」，點知佢的資產黑洞極大，政府注資850億美元唔夠，又再注資，如今夾埋放咗1500億美元入去，都未知家公司康復未，AIG股價當然唔 得，現價1.6美元，當日炒政府入場買股者，又唔見咗一半，撈底者撈嗰個死嗰個。如今AIG市值只得214億美元，亦同花旗依家的市值差唔多，一家美國最 大保險公司，一家美國最大銀行，變到咁無人估得到，花旗股價已預示了政府最後不能不救的事實，但救完亦唔會好好景也。

花旗都落得咁嘅下場，依家都無乜邊隻股可以稱得上穩陣股，特別係金融股，包括香港的滙控(005)在內，都唔好盲目相信佢一定得。香港人唔知，過去滙控拍 馬都追唔上花旗，所以當年的滙豐大班都要冒險去美國買按揭業務去追趕花旗，依家佢哋的願望實現啦，滙控的市值係9326億港元，差不多係花旗6倍，咁又如 何？

花旗跌到咁恐怖，全世界的投資者都會諗，其他環球銀行股到底買唔買得過呢？當日的賣點成為今天的票房毒藥。

對賭期權輸大錢

股市跌成咁，連股神巴菲特都領嘢，佢隻旗艦公司巴郡近排都跌到一仆一碌，上周五雖有強勁反彈，大升16%，但係亦只有9萬美元一股，當日曾低見7.9萬美 元。巴郡在今年年頭是14萬美元一股，之後略回，到9月股神四出收購時，巴郡又升番上14萬元的高位，到近期公佈第三季度盈利大倒退77%時，股價才急促 回落。

股神衰幾瓣，但最引人注目是巴郡的指數對賭合約，面臨巨額虧損的風險。巴郡早前對外出售了48.5億美元的對賭合約，保護買家對抗標普500等全球四大股 指的未來下跌的風險，據合約協定，如果在2019年開始的特定日期時，合約相關指數低於巴郡賣出合約時的點數，巴郡最多要賠370億美元俾合約買家，巴郡 等如沽出「認沽期權」，收取高期權金，讓看淡的買家買保險。雖然有關合約未到期，但巴郡仍須按那些合約的現值入帳，近日全球股市急挫，巴郡在今年9月30 日的季結日，佢已經對售出的指數對賭合約減值67.3億美元，市場的走勢明顯和股神的估計背馳。

另外巴菲特叫巴郡入股高盛和通用電氣，如今仍然坐艇。在今年9月23日，巴郡宣佈購入高盛50億美元的永久優先股，這些優先股有權以每股115美元轉換成 普通股，當時高盛股價仍在123美元以上，但近日強如高盛也急插，上周五跌至53.31美元，較巴菲特入股時暴跌了近57%，當日定出有折扣的換股價 115美元，如今看來已屬天價。巴郡買入的優先股性質近似債券，市唔好可以唔換股收取高息，價格雖然不如普通股那樣大起大落，但如今這批優先股仍要大幅減 值。

巴郡入股高盛7日後，股神在10月1日又宣佈巴郡入股通用電氣，佢注資30億美元，買入優先股，可以按每股22.25美元的價格購入通用的普通股，當時通 用電氣股價24.50美元，但近日股價亦大幅回落，上周五已跌至14.03美元，比當時累計跌了43%，巴郡買入的優先股亦大幅減值。

過早入市有排捱

股神今次中招，主要因為睇好得太快，他入股高盛和通用電氣時，杜指大概在10,300點左右，是之前跌市的底部，但股神入市後杜指終於穿底，個多月內再跌至上周五的8046點，再大跌了22%，就令股神的投資風險大增。

股神買完嘢之後，在10月中下旬在美國《紐約時報》撰文，話大市可能已見底，話佢自己會入市。我當時話股神睇大方向好好，但估底就唔係幾準，好多時睇早咗 半年、甚至1年，股神的話不能不信，也不能盡信。依家遇上的是百年不遇的金融海嘯，股市跌得急到嚇死人，買早半年的代價也很高，若是私人買股，買咗再跌可 以唔睇唔理，但美國上市公司季季要報數，就無得唔理。股神自己講過，佢唔擅長捕捉股市的頂部和底部，曾經試過買早咗個市再跌，佢啲基金客戶就經常打電話來 問，搞到佢要躲在枱底，唔敢再接電話。今次恐怕會歷史重演，相信佢都沽唔到高盛可以在個幾月內急跌43%。

雖然股神一般會愈跌愈買，但今次未必有咁大膽，因為呢場風暴咁厲害，若再愈買愈跌，就會把公司暴露在風險中，銀行隨時打電話來追債。在這種跌到變型的日 子，生存比賺錢更重要，家公司在跌市撈底撈得唔夠多，只會賺少啲，唔使死，但太過進取，撈得太多，股市走向和自己的意願相反時，隨時有沒頂之災，過去不會 發生的事，如今也會發生。試想銀行都怕自己會執，所以在非常時期會用辣招控制風險，客戶絕對可以被佢犧牲掉。

若在未來半年1年，你一股都無買，5年後你可能好後悔，因為到時應該已是一片晴空，但你買得太快，太急，太狼，亦好可能更快後悔，因為今日的低位，好可能係明日的高位。

部份進出降 低成本

最近我到北美，同一個美國朋友傾起美股，當時杜指在9000點，佢認為美股最低都係7000幾點，甚至已見底。我就無佢咁樂觀，話杜指隨時要見6字頭，要 跌番落去6000幾點，佢露出一派不可想像的神色，看來美國人對美股的看法亦有點偏向樂觀。我的悲觀源於美國好多嘢似乎未跌夠，好像紐約的樓價，跌了 10%左右，佢哋認為好大件事，我話香港豪宅一兩個月唔見50%價錢，我唔明點解美國樓價跌咗咁少。美國好多資產未跌得夠，和佢哋搞出來個鑊的災難性未成 比例，所以唔理美股點反彈，仍有再大跌之險，不可不防。

若果「投資的我」見到跌市想買吓嘢，但又驚有排都未跌完，我有個老友的；買股方法可以參考，佢買股投資有兩大要點，第一係分注，佢唔止按指數分注，只在暴 跌時才買，亦按時間分注，例如估個市仲要跌多一年，就分四注，每季入一注，如非好例外的情況，否則唔好過快將所有本錢一次過投入股市中，以防股市愈跌愈 深，你把子彈射清，將來有平貨都無力去執。第二係部份進出，唔係死揸唔放，例如佢分一年分4注去買，在大市上次跌到10,600點時入了第1注，即係只入 了4分之1貨，但大市隨後大幅反彈，去番15,000點，佢就將一半貨沽出，先行鎖定部份利潤，手頭上仍持有8分之1的貨，將出貨賺價扣除手上餘貨的成 本，如果賺到20%(其實那次反彈的幅度高達47%)，即手上還有8分之1的貨，成本再減兩成，等如在8,000幾點時入貨一樣。老友就是利用這個方法， 慢慢儲貨，佢話散戶無可能有股神對股票價值的判斷，但勝在走位較靈活，用啲進出伎倆，都可以買到平貨。

<<轉載自頭條日報>>