陸 羽 仁 - 金 融 High Tea (27/11/2008):結算近大夾淡倉

美國政府推出8,000億美元借錢買債券救市措施，美股無乜力再升，恆指昨日卻繼續造好，高開111點後反覆向上，半日已抽升439點，下午略為回落後再 頂番上去，恆指以全日最高位收市，收報13,369點，大升491點，升幅3.8%。恆生指數期貨收市報13,285點，上升499點，低水84 點。國企指數收市報6,934點，上漲276點，升幅4.2%；大市成交417億。

港股昨日表現相當強勁，雖然話美國聯儲局大力放水，但早一晚美股杜指只升36點，升幅0.4%，比港股早開市的日股亦跌，但港股一開市就升，而且愈升愈 有，仲帶了部份亞洲股市上，如果話香港升市係因為聯儲局放水，無理由香港威過美股、日股，如果話香港因為內地大幅減息而偷步升，但內地上證綜指也只是微升 0.5%，今次減息似乎又保密得好好喎。

「勁假時段」亂曬籠

中環茶友話，近排好多散戶都睇淡，期指都沽咗唔少啦，所以大戶就借住明日期指結算，趁機大夾淡倉，殺到明日就將淡友全部挾死啦。咁啱內地在昨日港股收市後公佈大幅減息，大戶更如有神助，今日應該會發力頂高等期指結算啦。

茶友又話，大戶隊高滙控(005)，就頂住指數上咗114點，另外又大力炒高地產股。你睇昨日收市前競價時段，滙控又被嘜高1元，以81元收市，大升 5.9%，真係做到出曬面，難怪經紀們都叫競價時段做「勁假時段」，加上前日大摩MSCI指數換馬，又在競價時段搞到一堆股份狂升急跌，例如隻中大印刷 (055)被踢出MSCI指數，前日急插31.1%，主要在競價時段跌，昨日又急升番32.3%，識得玩呢啲指數換馬兼在「勁假時段」造馬的大戶，相信都 賺到笑，唔知交易所諸公知唔知民意已經怨聲載道呢？

人民銀行在收市後突然出手大幅減息，刺激內地經濟，人民銀行宣佈，從今日(11月27 日)開始，下調金融機構一年期人民幣存貸款基準利率各1.08釐，係11年以來最大的減幅，令一年期存款利息減到2.52釐，貸款利息5.58釐。另外， 人行又宣佈從08年12月5日起，下調工商銀行(1398)、農業銀行、中國銀行(3988)、建設銀行(0939)、交通銀行(3328)、郵政儲蓄銀 行等大型存款類金融機構的人民幣存款準備金率1個百分點，並下調中小型存款類金融機構人民幣存款準備金率2個百分點。

未減完息人仔有壓力

內地今次出手咁重，令市場有少少意外，除咗話因應上次國務院的要求外，相信內地經濟情況都幾嚴峻，一直有傳聞話按現時走勢，若果阿爺唔加快做嘢，第4季 GDP可能跌到6%；世界銀行剛剛將中國明年GDP增長，由9.2%調低到7.5%，所以中國要全力出招，力保明年有8%的增長。內地專家估計，人行將來 可能要再減息1.08釐。若然係咁，一年存款利息會減至1.44釐，相信人民幣匯價還有點向下走的空間。

阿爺出重招，對股市有短期效應，內地股市而家1897點，可能會炒一炒，對香港H股也有利。

銀行股中以渣打(2888)表現最靚仔，里昂維持渣打「買入」，以反映供股集資提高資本屬正面，目標價削至104元；高盛則降渣打目標價至89元。渣打建 議以每股45.11元，91供30股，明天除淨，該股繼昨天反覆重上90元兼成交倍增，最高見103元，收市報99.8元，大升10.5%。如果渣打除淨 後又再彈番上現價，個供股權隨時每份值50元樓上，若然係咁，股東真係唔使客氣，先沽供股權套現較為上算。

地產股普遍造好，升幅明顯，長實(001)升5.3%，將推出新盤的新地(016)升8.

6%、恆地(012)升6.9%、新世界發展(017)升5.2%、信置(083)升8.2%、恆隆(101)升4.8%；而收租股九倉(004)獲高盛 納入該行亞太區「確信買入」名單，認為目前股價折讓60%，比率過高且不合理，維持其目標價24港元，九倉股價大升12.9%、太古A(019)升 4.5%。樓價未跌完，但市勢定一定有番少少成交，地產股先行反彈，但嚴冬未過，似乎未到春暖花開的日子。

<<轉載自頭條日報>>