陸 羽 仁 - 金 融 High Tea (02/12/2008): 慢半拍跟人炒易扮蟹

美股上周五續升，亞洲股市個別發展，恒指12月第一個交易日低開113點，下跌至全日最低位13,659點，比上日下跌近230點，之後和內地A股一起回 升，突破14,000點後升幅擴大，最高升至14,254點，下午見高後回順，恒指在收市前競價時段去番14,108點收市，上升221點，升幅 1.6%。不過現貨收市後期指插低，收報13,870點，跌118點，低水高達238點，成交74,255張。國企指數收市報7,392點，上升184 點，升幅2.7%，大市成交439億元。

亞洲股市在月頭走勢較散，有好有淡，日股跌1.4%、新加坡股市跌2.4%，上海股市則升1.3%，升幅和港股接近。

阿爺派錢救家電業

美股杜指衝向9000點，這是重要心理關口，若能升穿並守於其上，將有助港股再上試反彈高位。但若果美股企唔住高位，港股就要先調整一下。

中環茶友話，炒作資金懶理大市，炒概念已可以走一轉，好似家電股就食正內需概念炒上，內地公佈國家加強「家電下鄉」政策，對農民購買家器如電視機、雪櫃和 手機等提供補貼，由原來的三省一市擴大到十四個省市，明年二月全面實施，對農民購買彩電、冰箱、手機及洗衣機等四類產品，按產品銷售價格的13%由政府給 予農民買家提供財政補貼。政府亦對補貼產品設定了最高限價，彩電不超過2,000元、冰箱不超過2,500元、洗衣機不超過2,000元、手機不超過 1,000元。估計涉及電器4.8億部、累計拉動消費達9,200億元人民幣，政策等如由阿爺派錢救一救本身已打到殘的家電業，亦符合谷內需的大政策。

這個消息上周五都爆咗出街，但有關股份未大郁，昨日正式公佈就馬上借機炒上，海爾(1169)及TCL(1070)分別狂飆56%及57%！創維(751)及威靈控股(382)亦大漲24%及14%。大炒內地政府派錢谷家電消費的概念。

陸羽仁做「?仔」嗰陣時，好鍾意睇報紙諗幾諗才入市，但好多時都扮蟹收場，假設我當年睇到呢條「家電下鄉」的消息，見到9200億元呢個銀碼，會覺得家電 股好有概念，就打個電話俾經紀落盤，希望執番佢3、5成(第一日都升5成幾，覺得再升5成都唔係好難)，買完隻股通常仲會升少少，但係又未到心目中的價 位，但等兩等隻股已碌番落去，唔止蝕隨時又變作長線投資。

炒家或者手上已有貨，一見好消息就馬上隊隻股上去，到消息見報係人都知時，就引出更大班傻仔落疊，炒家即刻派貨出街，往後隻股自由飛行，一耗盡購買力就失 重下墮。散仔炒股慢半拍，跟人炒，易扮蟹，好似呢次家電股的好消息，有分析員就話，由於內地家電行業競爭激烈，電器銷售利潤非常微薄，政府的補貼對企業的 盈利幫助只是好過無，刺激過後，股價將很快打回原形。

人仔有貶值壓力

法巴宣佈佢嘅心儀股份名單，在9個市場挑選出28隻可以跑贏大市的大型企業股份，7家本港上市公司榜上有名，包括龍頭股滙控(005)、招行 (3968)、神華(1088)、財險(2328)、太古A(019)、騰訊(700)及康師傅(322)，話呢啲股份可視作長期投資，不過，由於金融風 暴負面因素仍未全部浮現，現時仍未係購買時機。即係話有目標股份都唔使太急買，不過名單可以參考。

該行亞洲區研究部執行董事JohnHetherington預測，恒指及國指明年目標價分別約為18,000點及8,700點。過咗半場風暴，證券界都回歸現實，即使睇好明年，目標價都只係18,000點，唔再動不動講20,000點樓上的目標矣。

人民幣匯價繼續回，昨日兌美元收報6.8848，跌0.73%，創了最大單日跌幅，你知人民幣匯價雖然話和一攬子貨幣掛鈎，由阿爺話事，睇個樣想放人民幣匯價下去，現時一年期人民幣遠期合約造7.225，已穿7算，顯示市場估人民幣未來一年仲可能有近5%跌幅。

阿爺當日把人民幣升值兩成以上，係受美國佬所逼，情非得已，人民幣如此急促升值，雖然略舒緩進口通脹，但對出口打擊極大。如今美元已從低位大幅反彈，阿爺絕對有意願讓人民幣再貶值多一些，以助出口，救救內地經濟，所以存咗好多人仔的讀者要執生啦。

<<轉載自頭條日報>>