陸 羽 仁 - 金 融 High Tea (03/12/2008): 冬江水冷鴨先沽

恒指跟隨美股急挫低開736點，跌至13,345點後，反彈上13,514點，之後就窄幅上落，收報13,405點，挫702點，玩咗成日都喺接近開市時 的跌幅；期指收報13,238，跌632點，比現貨低水167點；國企指數挫389點，報7002點，大市成交只得385億元。

昨日恒指現貨尾段仲頂住，但現貨收市後期指插，一插插咗近200點，期指又炒低水167點收場。中環茶友話，上日期指尾段急插，搞到大低水238點，當時 都覺得唔對路，最後睇埋美股，一開市杜指就插300幾點，所以上日尾段沽期指班友，真係預知美股會插，睇嚟都係外資大戶，玩美股亦都係佢哋啦。

茶友話，呢班人唔係春江鴨，係冬江鴨，預知美股會插，所以插定期指。唔好以為佢哋想造低期指，而家只係月頭，唔需要太大力造期指個價，佢哋只係大手沽期沽到大低水，大戶喺尾市才出手，令散戶連反應的機會都無埋。

成交愈來愈縮

昨日大市成交只有385億，連400億都唔夠，我在半年前已同經紀張預言，話個市會愈來愈靜，最後得番200、300億成交，經紀張當時唔信，依家慢慢變成現實。

其實條數都好易計，在32,000點時，大市好易成交過1000億，因為股價大，平均係依家2.3倍，如今除了窩輪每份價錢和當日相若外，股票價格縮晒水，自然成交額會細，然後再加上散戶愈炒愈無癮，愈炒愈人少，就令成交細上加細。

即使在熊市中，大戶都唔係玩直插，直插每日跌1000點，13個交易日恒指就跌到零，長期盤據香港的外資大戶，係炒波浪，雖然在熊市中波浪大方向還是向 下，跌到咁上下就會彈，大戶插又食你，彈又食你，左一巴右一巴先至食得盡。不過呢啲市散戶輸錢愈來愈多時，就難免有愈玩愈人少的局面，自然會好靜。

銀行股下跌，滙豐上調新造按息0.5厘至0.75厘，滙控(005)尾段在競價時段插至79元收市，挫6.4%，如果你睇埋按揭的市場佔有率，就知道滙豐為何要加按息。

據經絡按揭轉介公司研究部及土地註冊處最新資料顯示，11月份本港現樓物業之按揭市場佔有率，以滙豐最高，達28%，創05年1月有紀錄以來的銀行單月新 高；居第2位的中銀香港(2388)由10月的19.4%佔有率，輕微上升至19.6%，兩家銀行11月的按揭生意量佔整體市場的47.6%，差不多做咗 一半生意。渣打銀行繼續佔第3位，市場佔有率為7.7%。東亞銀行(023)就升3級至第4位，市佔率擴大至5.2%。從11月數字睇，其他銀行唔係幾敢 做按揭，只有滙豐及中銀敢較大手做。

大銀行做夠就加息

滙豐做咗咁多按揭生意，今年都收夠籌啦，所以新做按揭就加息，睇吓其他銀行跟唔跟，其他銀行跟，就大家齊齊收多啲息，其他銀行唔跟，滙豐做少啲都唔拘，結 果中銀昨日都跟滙豐調高按息0.5厘，兩大都加，其他銀行唔加都無，因為佢哋都無大條水喉去借咁多錢出街。總的來說，借貸市場未完會回復正常，銀行基本上 仍在收緊借貸，所以市民要借錢亦只有捱貴息。

中央計劃擴大「家電下鄉」計劃，從事製造家電的股份經過昨天急升後個別發展，海爾電器(1169)續升11.5%，但部份股份已開始腳軟，例如創維數碼 (751)跌7%、TCL多媒體(1070)跌6%。呢啲股份已出現我昨日所講的殺人陷阱，例如創維，最高搶過上0.55元，升過10%，但收市倒跌回 0.465元的水平，即係慢半拍高追無止蝕就唔見咗15%！

<<轉載自頭條日報>>