陸 羽 仁 - 金 融 High Tea (07/01/2009): 外資警示資金撤退

美股2009年首個交易日氣勢如虹，但好景不常，週一杜指重回9,000點樓下，亞洲股市開市卻沒有跟跌，日股早段升100點以上，內地A股先跌後升，恆 指卻高開49點後窄幅上落，惟12點過後急速下滑近160點，下午跌幅稍為收窄，在15,500點間呈橫行局面至收市。恆指連升三天之後，昨日收市報 15,509點，微跌53點或0.4%，大市成交增至539億元。期指收報15,534點，跌110點，比現貨高水25點，成交60,302張。內地A 股表現強勁，上證綜指升3%，收1937點，但香港中資股卻未能受惠，國企指數收市報8,645點，跌32點或0.4%。

股市悶悶地，在高位徘徊，未來要睇嚇美股炒奧巴馬上台可以炒到幾高，若果杜指炒上9000點樓上並企得穩，港股短期可以睇高啲，若果美股炒唔上就要小心啲。

銀行搶客炒 地產股

重磅股中移動(941)及滙控(005)成為拖累大市的最大元兇。市場雖然傳出3G牌將於未來兩天發放，惟有關消息已連續炒作多日，投資者趁「開獎」前獲 利已成慣技，中國移動成為沽售對象，最低曾見81.5元，跌逾4%，收市報83元，跌2.4%。聯通(762)更下跌5.3%報10.28元。

德銀表示滙控投資及私人銀行業務收入將續跌，並預期會有更多的貸款損失。

因此下調其2009及2010年每股盈利預測21%及26%，至1.54美元及0.88美元，目標價由83元下調11.8%至73.2元，維持「持有」評級。滙控股價持續偏軟，收市報76.95元，跌0.7%。

昨日部份消息有利地產股，瑞信預期本港樓價仍有18%跌幅，但估計樓市將於年中見底。瑞信又指，地產股估值開始吸引，佢地將新地(016)納為發展商首 選，目標價84.06元，反映其估值相對便宜及新盤銷售勢頭理想，新地連升4天，昨天收市升4.2%報73.25元。另外，建銀亞洲降新做按息低至 3.25釐搶客，亦利好地產股，長實(001)升0.6%、恆地(012)升4.4%、信置(083)升5.3%，而新世界發展(017)則大升 7.3%。但係陸羽仁覺得本地樓市未好得咁快，炒地產股反彈要守止蝕位先至好去玩。

齊估香港全年負數

各大行紛紛發表2009年經濟預測，睇嚟對香港經濟真係唔太睇好，高盛(亞洲)亞太經濟學家馮殷諾就提出資金有流走跡象，佢話雖然近日香港持續有資金流 入，令銀行體系結餘連創新高，因為環球去槓桿化及拆倉潮，促使資金需要尋找相對較安全的貨幣作避險，所以走入香港避一避。佢認為，本港銀行體系的結餘不會 再持續增加，近日息口有上升跡象，反映有部份資金開始流走。

馮殷諾話，由於環球經濟持續不景，預計本港09年全年經濟將會收縮3%，但2010年將可回覆增長3.5%；本港失業率料持續惡化，預期09年及10年的失業率分別為6%及6.5%。另外他預計樓市仍未見底，本港樓價今年將會再跌15%至20%，明年則再跌10%。

高盛睇到資金有外流跡象，估計今年香港GDP負增長3%，樓市更要連跌兩年，都可謂睇得相當淡。另外瑞信亦唔睇好，瑞信亞洲區首席經濟分析員陶冬話，現時 本港零售市道未有大問題出現，但若銀行不願借貸的情況持續，將會影響香港經濟，預計本港2009年及2010年的經濟將按年下跌2.2及2.1%，陶冬睇 香港GDP要連跌兩年，比高盛睇得仲淡，若果陶冬預言成真，港股隨時要衰到明年。睇完兩間外資行對香港的經濟預告，個心冷咗半截，因為兩家都估香港今年 GDP係負2.2%到3%，咁高嘅平均負數，即係話香港好可能衰足4季。

但佢哋對內地的經濟睇法接近，高盛馮殷諾話，內地雖然推出四萬億刺激經濟方案，以力保今年國民生產總值(GDP)達8%水平，由於預期內地樓市持續下跌， 加上措施落實需時，故料內地今年GDP增長只有6%，2010年則可回升至9%水平。他預計，今年人民幣匯價將會維持在現水平，內地將不會以大幅貶值支持 出口業。瑞信陶冬則睇高少少，話內地四萬億刺激經濟方案，可以保持經濟增長至少達到7至8%，並預期內地將於今年第二季將會推出穩定樓市及減稅政策，預計 內地2010年經濟增長達8.5%水平。

兩大行都估內地未必咁易保到8%增長，換言之，中資股都好難大炒，今年頭半年都係炒嚇上落市。

<<轉載自頭條日報>>