中電（002）跌2％，報53.7元，因花旗集團下調目標價20％，至48元；中國海外（688）升7.6％，報9.79元；恒隆地產（101）升 4.1％，報15.62元；合生創展（754）升14％，報2.69元；華潤創業（291）升7.8％，報11.84元；國航（753）升9.4％，報 1.86元；中石油（857）升4.2％，報6.25元；中海油（883）升3％，報5.91元。
中原話本港三十個主要豪宅項目售價由五個月前嘅每呎11835元回落到9741元，下跌17.7％（本港所謂豪宅係指一千呎以上）。
人行減息扭轉唔到劣勢
穆廸投資者服務公司發布一份名為「中國房地產開發商：流動性緊縮和銷售放緩所帶來持續風險」嘅報告，對未來十二至十八個月中國房地產開發業評級展望為負 面。原因係本地開發商面臨愈來愈大嘅運營不確定性，緊縮嘅信用環境及高水平嘅監管風險。作者係穆廸亞太有限公司助理副總裁曾啟賢；佢認為，銷售量收縮，而 房價下跌及今年上半年土地收購，導致資產負債表流動性及財務狀況惡化；加上未能獲得境外信貸，於是透過出售資產及項目股權或股本來募集現金去改善流動性， 但呢D機會已變得愈來愈少。另外，潛在海外投資者如房地產基金亦把資金調回美國，以應付信貸危機。該報告另一作者穆廸亞太有限公司副總裁蔡承業表示，開發 商完成建設中嘅項目後，令新樓供應量上升，進一步打擊市場。中央近期宣布減稅及放寬按揭限制，至今呢D措施影響如何仍係未知數。
私募基金Gaw Capital Partners已準備融資15億美元去投資中國地產；荷蘭國際集團ING Real Estate 亦集資7.5億美元，準備一年後撈底，看好嘅大城市包括成都、重慶同大連。
滬深三百指數升1.46％，收1870.47。
今年响金融自由化及全球化刺激下，為追求高回報而運用金融技巧及高槓桿率，過度涉足高風險證券化商品及金融衍生產品。一旦信用鏈斷裂，便引發呢次次按危 機。到雷曼兄弟倒閉，美國各大金融機構受到大量不良資產困擾，必須增加股東資金，唔係就只有減少借貸。從全球金融市場抽回資金，引發由9月18日起嘅金融 海嘯，無論股市及國際商品價格，甚至高息貨幣無一不出現暴跌；只有日圓及美元暴漲。最後各國政府聯手緊急注入大量資金，增加流動性，相信情況已穩定下來。
不過，金融機構仍唔願增加放貸，令需要資金嘅企業得唔到貸款，實質經濟最終陷入困境。本周開始，聯儲局直接向商業機構注入資金，希望解困。
展望未來，全球金融機構全面收縮信貸已無法避免；即假設恒生指數响10月27日10676點見底及道指响11月21日7449點見底，後市展望亦只能响低位徘徊，而唔係V形反彈。最樂觀係可以有U形反彈；最悲觀係L形。
中國人行宣布大幅減息及下調存款準備金率，可釋放6000億元人民幣流動性，以及阻止經濟進一步惡化，但唔可以扭轉劣勢。
中國經濟未來增長將嚟自內部消費，而唔係出口帶動，呢方面轉型有一定難度。何況面對世界金融危機仍在蔓延，不能有過分要求。
又到感恩節。去年感恩節我老曹曾大力警告美國次按危機爆發，要求各位準備熊市來臨。未來策略以持盈保泰為主，提出三七分（只把30％資金作投資用，70％ 作存款）。今年感恩節，我地已度過一個令人驚嚇嘅年份。展望未來，經濟收縮期最快要到明年第二季先結束，漫漫長路，未來重建需時。今天連花旗銀行亦需 bailout，可見情況惡劣成點。銀行必須出售優先股或普通股，去增加本身資本對抗資產負債表衰退。响依家嘅市況下，供股或發優先股，股東資金權益肯定 被攤薄。本周聯儲局已公布第二個8000億美元挽救計劃，令三十年期樓按利率回落到5.5％；至於幫助有幾大，木宰羊。
技術上睇，超級熊市第一期已完成，逐漸進入超級熊市第二期（即上落市）。明年經濟肯定好弱，成交額亦進一步下降；資產負債表衰退仍進行中。12月16日及 17日相信聯儲局再減息半厘，到咗呢一步，貝南奇手上再冇對付衰退嘅武器。政府已答應動用8.5萬億美元去紓緩信貸收緊，並已動用其中3.17萬億美元。 至於呢個Term Asset-Backed Securities Loan Facility計劃作用有幾大？可參考1990年至今日本政府嘅做法。利率响12月17日後已到咗無法再降嘅水平（半厘息同零利率分別有幾大？要專家先 至知）。不過，信貸市場仍在萎縮，銀行肯借錢而企業唔借，想借錢嘅企業但銀行又唔借嘅問題，到明年依然存在。通用汽車已要求Franklin Resources Inc及Primco接受票面1美元債券改為25美仙（依家市價只有13到22美仙），即係要haircut 75％（大債仔往往較債主惡！）；另向汽車員工退休金延期撥款70億美元。通用汽車8.375厘2033年到期嘅1美元票面債券上升5美仙，見19美仙 （如以19美仙計即有43厘）。通用汽車金融服務公司所發債券好D，公司計劃以每股55美仙回購1美元票面債券（但唔係現金，只係用優先股交換），甚至大 企業債券亦面對haircut！
雪茄伏今次要對付通縮
美國政府為協助企業，令唔少企業負債被轉換成國債。奧巴馬宣布委任雪茄伏做白宮經濟顧問幕僚長；雪茄伏1979年8月出任聯儲局主席，1982年年中成功 控制通脹。家吓八十一歲嘅雪茄伏呢次又可唔可以令美國經濟復甦？以佢今天嘅年紀、只能做part-time。過去十二個月美國樓市減值4萬億美元，美國股 市減值9萬億美元（未計債市）。美國已面對典型債務通縮（debt-deflation）──為減債而變賣資產，結果令資產價格下跌。理由係1982至 2007年過度投資或過度投機，因此而過度借貸，情況好似九十年代日本。貝南奇過去以為印銀紙及擲鈔票，便可解決問題，家吓已證明佢思想幼稚。聯儲局今年 由9月19日資產1.28萬億美元急升到11月19日2.19萬億美元；借出款項更上升十四倍，由470億美元到11月19日6530億美元，但股市同樓 市仍然下跌，貝南奇應返去大學重新研究點解。
至於雪茄伏呢名老將能否扭轉乾坤，把黑暗變成光明？睇吓點樣令美國經濟唔走上日本之路？美國已面對衰落期，呢點係好肯定，情況好似二十世紀初嘅英國。由八 十年代開始，美國逐步放鬆金融業監管嘅鐘擺，又向另一邊擺動，睇嚟難逃類似九十年代日式經濟，所唔同嘅係日本人口迅速老化，美國因新移民湧入，老化速度冇 日本咁快。
10月份美國耐用品訂單減少6.2％。美國商業活動收縮速度係1982年4月以來最快。估計美國樓價由2006年高峰到見底，必須回落25%至30％，家吓只完成一半調整，政府可以做嘅嘢只係減慢下調速度，而唔係改變方向。
美國美思百貨打算喺Black Friday大減價，Kohl' Corp亦計劃減價40％去對付沃爾瑪百貨嘅低價產品。今年係消費者嘅感恩節！
2006及07年美國企業壞賬率只有0.6％，响衰退高峰期，企業壞賬率可上升到10％，呢個係AIG出事理由。CDS因素已令全球股市冇咗10萬億美元 市值；依家聯儲局卻擔任AIG角色，向企業貸款提供擔保，希望冇事啦。如果出事，恐怕令全球股市再失去10萬億美元市值。我老曹八十年代好佩服雪茄伏，但 呢次佢出嚟做part-time，老實講真係唔多睇好。10月份美國消費者減少消費1％，係「九．一一慘劇」以嚟最差一個月。雪茄伏1979年8月上任， 到1987年8月退位畀格蛇，令美國通脹率從此馴伏，直到2003年6月格蛇唔聽話，把利率降至1厘為止，先將通脹率又再放生。不過，呢次雪茄伏對付嘅係 通縮唔係通脹，又有乜板斧？聽講奧巴馬背後謀臣係股聖畢非德，但今年股聖運氣都幾差。
英國將再減息
滙控（005）可能需回購倫敦總部，因貸出款項今天到期，而西班牙發展商Metrovacesa又打算放棄。呢幢物業响去年4月以10.9億英鎊出售，滙控提供8億英鎊貸款。
英國嘅Woolworth 1909年開業，經歷一百年後，可能响明年破產。家吓有分店八百多間，員工三萬多人，經歷由大英帝國最興旺到沒落。
今年第三季英國消費係1995年以來跌幅最大，GDP下降0.5％係十六年來第一次連續兩季負增長，可以確定衰退。雖然財長已提供200億英鎊刺激計劃， 恐怕幫助唔大，因為信貸仍在收縮中。英倫銀行已減息1.5厘，至3厘（1955年以來最低）。估計12月仍會減息半厘，至2.5厘。不過，11月22及 23日嘅零售數字，較去年同期減少5.9％，因失業率在急升，
礦務公司面對價格大幅回落，路透Jefferies CRB指數今年跌幅超過50％，最低限度影響十六個國家可能進入衰退。
乾貨輪租金已跌至二十二年新低，波羅的海指數見762點，係1987年1月以來新低（今年5月份11793點）。家吓每天船租只需2800美元（5月份 2.34萬美元），最大型乾貨輪船租金由6月5日23.3988萬美元下跌到近日2773美元一天，擔心唔少航運公司明年出現財務危機。
全球經濟明年陷衰退
代表中東股市嘅MSCI GCC國家指數响今年回落57％，估計未來六個月再跌20％。油價由7月11日至今急跌66％，令中東收入大減，但支出卻減無可減，例如杜拜金融指數 2004至07年升493％，住宅升四倍，一旦出現調整，跌幅有幾大？杜拜指數今年已跌69％，跌幅較滬深指數更大。中東地產泡沫早已爆破。
展望未來，1989年我地有六四事件，其後柏林圍牆倒下，蘇聯、東歐及波蘭變天；1999年我地有千年蟲；明年係中華人民共和國成立六十周年，完成一個甲 子。新中國成立首三十年一塌糊塗，接住喺1978年實施改革開放政策，GDP保持三十年平均每年10％增長，明年又點？有人話第三次改革開放開始，最終會 成功嗎？
至於二十一世紀係咪中國嘅？便睇中國响政治上改革開放進度如何而定，小心犯行百里者半九十毛病。
國家資訊中心發布嘅第五十三期《經濟預測分析》指出，美國次按危機已逐漸演化成全球性金融危機，全球經濟增速大幅放緩，無論周期性、結構性調整及外部環境 在不斷惡化下，中國亦出現逐季減速趨勢，特別係9月份以後，工業生產大幅減速，部分行業出現大面積虧損。展望第四季度，中國已面對過快下滑趨勢，國家已推 出4萬億元人民幣計劃，擴大內需，同時實行積極財政政策及適度寬鬆貨幣政策去穩定經濟，但擴大內需要一個過程，短期內經濟仍延續下降。
IMF 11月6日把明年全球經濟增長預測下調至2.2％；11月11日世銀把明年世界經濟增長率由3％降為1％，顯示明年全球將陷入衰退；美國已公布第三季GDP下降0.3％，達到近七年最低位；油價已大跌60％左右，糧食及有色金屬價格亦進入熊市。
中國9月中旬才開始減息，估計需時三至九個月才顯現效果，即最快要到明年年初，最遲明年年中才顯現出對經濟增長拉動嘅作用。
10月份工業增長速度已下降至8.2％，係1999年以來最低增速。家吓第二產業佔中國GDP接近50％，至今中國經濟增長仍以工業為主要拉動力嘅特徵好 明顯。10月份中國製造業採購經理人指數（PMI）跌至44.6％，較9月跌6.6個百分點，意味未來工業生產面臨減速；加上房地產及汽車等需求持續放 緩，能源及原材料價格大幅下挫；再加上新《勞動合同法》實施將帶動成本上升，企業利潤將進一步下滑。
<<轉載自信報>>