陸 羽 仁 - 金 融 High Tea (28/11/2008):股民患上救市疲累症

內地大幅減息減存款準備金率、美股昨天大升，加上今日期指結算，三管齊下，淡倉被夾個不亦樂乎。恆指昨早高開532點，升至全日最高的13,931點，挑 戰14,000點關口不果，指數掉頭回落，下午恆指跟隨內地A股回落，拾級而下，升幅不斷收窄，由最高直插近600點，最低倒跌36點。尾市後抽218 點。恆指收市報13,552點，上升183點；國企指數收市報7,121 點，上漲187點，升幅2.7%，全日大市成交只係502億。現貨月期指以13,717點結算。期指收報13,580，升319點，比現貨高水28點，成 交81,399張。

美國今晚為感恩節假期，股市休市，港股失去外圍方向，好大機會自由浮動一番。市場昨日焦點係內地大手減息，但睇番成個月走勢，好清楚係典型夾淡倉行動，通 常大戶係缺乏方向的市況下，會任由大市係下旬插低，趁呢個機會轉手造好，跟住到月尾就托高結算，昨日大戶夾倉真係一元都賺到盡，最明顯係上晝托高咗指數， 到下晝收夠籌，臨尾一個鍾就放軟曬手腳，全日結算個價就「塌塌冧」，幾乎一點都無浪費。按正常情況，下個月月頭應該又係自由浮動時段，由於無咗大戶有型之 手，個市反彈力度就受到考驗嘞！

夾高結算典型走勢

對於大市中期走勢有證券分析師表示，全球經濟已經歷了最困難的時刻，目前正處於緩慢回穩階段，除非還有大公司倒閉，港股將步入技術調整反彈期，跌破 10,670點的可能性不大。摩根大通在週二舉行的 2009年亞洲及新興市場選股策略記者會上，其董事總經理兼亞洲及新興市場首席股票策略師AdrianMowat估計，香港股市走勢「已經見底」，建議增 持中資類股票。

內地大幅減息，內房股繼前天偷步上揚後，昨早再度借勢炒上。龍頭股中海外(688)大升7.58%、華潤置地(1109)升 5.32%、遠洋地產(3377)升5.3%、雅居樂(3383)升7.2%、世房(813)升9.7%、富力(2777)及合生創展(754)勁升 12%和14%。不過，評級機構穆迪昨日發表報告指出，預期相關地產商將面臨嚴峻考驗，並給予內地房地產商在未來12至18個月評級展望為「負面」。

內地管理層由關注經濟過熱轉為擔心增長放緩，大力放寬信貸去催谷市場熱度，對備受銀根壓力的內房股係好消息，但中環茶友笑言，市場現在患上救市疲累症，當bailout成為今年最熱門詞語後，投資者對挽救或振興經濟措施已懶得作出反應。

從客觀效果嚟講，政府措施通常都要一段時間先發揮作用，而且通常係政府做降溫，效率會比刺激高好多，內地近幾年的房地產熱，誘因之一是全球大量熱錢湧入， 谷高內地資產價格，現在熱錢減退，就算政府放水，但少了外資催動的購買力，樓房地產市道是否好似食完特效藥咁話好就好，真係認真難講。

最新業績未 反映放緩

同一時間，公司公佈出來的業績，開始反映放緩影響，莎莎(178)昨日公佈半年業績，生意下滑約百分之三。

上半年本港市道仲係唔錯，當時做生意最主要係應付成本上漲問題，包括租金同人工，但九月份雷曼倒閉，跟住十月爆發全球性股災，港股出現巨大跌幅，消費跟住 先放緩，換言之，美國金融海嘯的衝擊，並未係九月份的結算日前反映出來，亦即係話現在好多股份經過大跌，市盈率數字變得都好吸引，但數據都係歷史，不能代 表金融海嘯後的情況，估計生意低潮會未來半年陸續浮現出來。

好似莎莎公佈半年純利跌3%，已經係相當之醒，不過真正考驗係下半年，因為大部份零售商要捱高峰期的成本，包括上調咗的租金同人工，同時又要捱低潮期的生 意，以零售業一般只有幾個巴仙利潤，好易就蝕大本，莎莎今年並無大肆擴張，加上手頭現金充足，故此可以派發特別息，成為支持股價的因素，所以在公佈前兩 日，股價開始由低位反彈。可以相信，零售股中，並非間間好似莎莎咁手頭大把錢，可以借派高息來支持股價，如果公司因為過度擴張影響業績同現金流，純利倒退 兼減少派息，股價可以跌到好殘，所以零售股雖然有聖誕大平賣，但是否執得過，都真係要戴眼識股先好買。

現代美容(919)宣佈，曾裕因健康理由辭任公司行政總裁、執行董事、董事會主席、薪酬委員會主席及提名委員會主席，以及薪酬委員會成員及提名委員會成員 之職，由2008年11月26日起生效，任執行董事及副主席李守義，曾裕因為私人投資，早前傳出同投資銀行有爭拗，今次公司人事變動，多少又會觸動市場神 經。

<<轉載自頭條日報>>