陸 羽 仁 - 金 融 High Tea (04/11/2008):阿爺解內銀股金剛圈

隨着恐怖10月的過去，投資者緊張情緒稍稍紓緩，亞太區股市在11月首個交易日，普遍走高，香港恒生指數在外圍股市上升帶動下，高開467點，上午早段曾 一度大升920點，重上20天移動平均線，在挑戰15,000點不果後，升幅逐漸收窄，下午跌勢明顯，跌至接近全日最低點收市，恒指收市報 14,344點，升375點，升幅2.7%。現貨收市後期指再落深啲，收報14,186點，升256點，低水158點。國企指數收市報6,806點，升 195點，升幅3%，全日大市成交521億。

大市主要由龍頭股中移動(941)帶領，收市報70.8元，升4.4%；滙控(005)則微升0.5%，報92.5元。滙控在收市後公佈維持第三季派息1.4元，恒生都派番1.1元，淡市頂住不減派息，叫做有所交代啦。

中環茶友話，昨天大市走勢都唔係幾靚仔，先高後低，由上午最高見14,889點，一度升咗920點，插番落來，最後只升375點，期指又低水158點，睇嚟15,000點呢個大位阻力都幾大。近期最好先守住14,000點，才可以持續反彈之勢。

成面血企番起身

茶友話，呢啲反彈市好蝦人炒，彈得好急，怕佢好快就見咗反彈高位，但短期內好多股5%、10%咁升，又會令人覺得幾好景，開始話最衰上星期一無買啦，呢種後悔心態會引人追貨，不過追得遲小心摸中個小浪頂啦。

經紀張話就唉聲嘆氣話自己係過來人，佢在上月中大市16,000點時，覺得回到差唔多啦，見隻平安保險(2318)跌到40元，呢個位係上兩個浪下跌的低 位，佢以為係見「三底」，就撲入去接貨，結果大家都知，到黑色星期一最低見過23.5元，那時經紀張差唔多輸咗一半，死忍無俾人震番出來，到呢幾日大市急 彈後，隻嘢到昨天只係收32.8元，仲唔見18%。經紀張牙痛咁聲，話20樓跌落來固然無得剩，佢5樓跌落來都係得番半條人命，依家斷手斷腳叫做成面血企 番起身咋，相信好多過早撈貨的散戶都有同一命運，總之買股就要小心啦。

昨日之底，係今日之頂，反彈都唔易去番以前的支持大位，短炒買早咗，隻股穿位向下，上唔番去會好傷，我叫經紀張定位止蝕，見隻嘢升可以睇吓，一唔對路唯有走人，輸少當贏嘛。

阿爺不斷出招救市，終於肯放開內地銀行頭頂的金剛圈，人民銀行新聞發言人李超日前在接受新華社記者採訪時首次透露，為靈活有效應付國際金融危機帶來的影響，保持中國經濟平穩較快增長，央行目前已不再約束商業銀行的信貸規模。

呢個信貸規模係早前阿爺嚴控內地銀行放貸的主要手段。去年加息、加銀行存款準備金都唔能夠遏止熱錢流動時，阿爺就出行政手段，在今年年初，一改往年按總規 模調控商業銀行信貸的方式，採取了按季度調控商業銀行放貸規模，即係每家銀行每一季都有一個貸款限額，到數就不能再借，限到死一死。今次係央行首次放開呢 個金剛圈，雖然話金融海嘯已令企業信貸需求轉弱，但放寬措施後，內地銀行經營的靈活性就大咗。

炒三通食夠要走

央行這一招等如傳出銀根會放鬆的訊息，市場預計2009年的貨幣政策環境會比2008年更加寬鬆。受利好消息帶動，內銀股曾經狂抽，但下午升幅回順，工商 銀行(1398)曾經急升10.2%，最後只升5%；招商銀行(3968)亦曾大升9.6%，最後只升3.3%，其他如建設銀行(939)升2.7%、交 通銀行(3328)升1.8%。倒是細碼的內銀股如中信銀行(998)就狂升16.5%。

中環茶友話，在大市暴升時，中央收水一時阻不到升勢，效果要過一陣才出現。而家情況反轉，在大市急挫時，中央放鬆宏調一時也阻不了跌勢，股份彈完還有壓力，放水的效果，要較長線才可反映出來。

台灣股市在大陸海協會會長陳雲林訪台之際造好，投資者憧憬兩岸將就運輸和金融等方面談判達成具體協議，台灣加權指數收盤漲124點，或2.6%，而香港三 通概念股再度被狂炒，亦有不錯表現，富邦(636)最誇張，飛漲81%，閩港控股(181)狂飆68%、東航(670)漲11%、閩信(222)升 12%、廈門港務(3378)升14%。概念呢家嘢，炒完就要散啦，唔好呆守概念股等開飯呀。

<<轉載自香港經濟日報>>