陸 羽 仁 - 金 融 High Tea (10/11/2008):惶恐與機遇

港股上周五受本地銀行減息刺激，由低開517點，到最後倒升453點，收報14,243點；國企指數升195點，報6,794點，大市成交僅得487億元。期指收報14,200點，升470點，比現貨低水43點。

金管局接連出招，除了在銀行體系注資，亦以低於市場利息的價格，拆出資金畀銀行，拖低銀行同業拆息，一個月拆息跌至近1厘，創4年低位，銀行無乜藉口唔減 息，聞說政府在上周五早上仍和銀行拗數，最後逼得銀行減息。滙豐在當日下午宣佈將最優惠利率由5.25厘調低至5厘，渣打香港亦跟隨減息，刺激地產股回 升。

港股隨美股波動，美股在上周三、周四連續兩日大插近10%後，上周五回升。

當日壞消息一籮籮，美國10月失業率升上 6.5%，是94年以來的新高，通用汽車又要求聯邦政府救助以免於破產，話自己未必有足夠現金維持到年底，通用和佳士拿的合併商討要暫停。但美股並無受這 些壞消息影響，杜指照樣反彈248點，升2.9%，升番到8943點的水平，而標普500指數亦升2.9%到930點。

美股遇壞消息照彈

美股上周雖然在奧巴馬當選後炒好消息出貨急回，但跌到10%左右又企定，見壞消息唔再跌，有少少尋底feel。

上周睇到彭博訪問前大摩全球策略師、對沖基金TraxisPartner的創辦人碧斯，內容值得一記，碧斯認為美股在10月中已做出一個重要的底位，雖然將來或會再回試這個低位，但美股標普指數有機會上1100點的高位(有18%的潛在上升空間)。

碧斯認為美股上周四那種急跌十分嚇人，有不少對沖基金頂唔順，要清盤式沽貨，不過雖然賣者不斷賣，但亦有人撈貨。

彭博的主持人追問碧斯，作為一個長線投資者遇到這種情況應該怎樣做，碧斯的回應不無感慨，話雖然他也想長線，但對沖基金的投資者可能唔係咁睇，所以雖然他 認為美股長線走勢會向上，實際上他會非常審慎，因為股市一日好，一日壞，非常難以預測，他的基本假設是估計標普500指數中線會升上1100點至1150 點的水平(這是10月3日時標普500指數的水平，當時杜指約為10,300點)。

碧斯估美股已見底

碧斯雖然傾向睇好，但也認為即使大市已見底，但按過去經驗，都無可避免要以某一形式再試一下底，造出一個雙底；或許明年第一季的經濟疲弱可以係一個再插的理由，但他相信標普500指數早前見過的839點已見底(這是10月10日的低位，杜指同日造出的低位是7882點)。

碧斯認為依家的股票委實便宜，除非世界經濟崩潰美股才會穿底向下，他估計只有四分一至五分之一的機會崩潰，若然崩潰就會出現長期的衰退，所以他說股市已見底只是一種判斷，不是一種肯定說法。

他認為美國正處於一種緩慢重生的走勢，新總統奧巴馬會推出有利經濟的措施，所以明年下半年應該開始OK。雖然企業盈利會倒退，但市場早已知曉此一趨勢。

碧斯選擇的股票是航空股、投資銀行股票，以及美國細碼價值股，他認為有很多平貨，值得小心選擇。他開始以對沖的原因買入，意即買入少量股票，以對沖股市上升而自己無持倉的風險。

碧斯70幾歲人，見慣美股大風浪，但如今評論股市，仍看得出他誠惶誠恐，他這種惶恐自有其理據，佢係對沖基金操盤人，對沖基金投資者每天都睇住佢的表現， 基金經理話點長線投資都係假，做錯短線決定，例如買入太多貨但大市再試新低，基金就會在客戶贖回潮中沒頂，所以碧斯不能不審慎。

專揀跌到殘好股票

但他基本上是一個看好派，在10月中後段股市最混亂時，他當時的評論是這種波動市根本「不能投資」，但如今轉調為股市已見底，相信他是看到金融市場有紓緩之象，才會有較樂觀的評價。

你可能會問，咁陸羽仁你點睇呢又？香港又會點呢？自今年5月股市股市確認步入熊市後，我一直都係淡友，但也要承認，我估唔到股市跌得咁快，咁深。我本來認 為呢次跌浪跌到15,000點都差唔多啦，跌完彈吓，明年初等經濟仆低再插，然後見底。點知10月呢一棍跌落來，勢如破竹，連11,000點都穿埋，10 月 27日已跌到10,676點的低位。

陸羽仁聽華資大孖沙講，呢一浪港股插落來，唔止係外圍差拖低港股咁簡單，係有外資大戶大力沽空港股。大戶做你世界，係要借勢，上月很多對沖基金唔掂，要大 力沽港股回祖家應付贖回，佢地係不問價咁沽，外資大戶就搭順風車，沽空期指之後，就隊住滙控(005) 和中移動(941)兩隻大股，係咁插低大市搵食，滙控可以被人一、兩日內由90元插到75元，就知呢班友幾狼。到10月27日一日跌1603點兼無反彈， 就知佢本來未插完。

港股可能再被狙擊

聽聞當時有唔少人向政府高層報料，話個市跌得唔正常，懷疑有外資大戶操控插低港股，政府半信半疑，就在10月28日早上派證監會去查空倉，一查之下，外資 沽空盤即刻雞飛狗走，大市就從低位反彈。既然外資咁怕俾人查，當然有蠱惑嘢啦。以97年金融風暴的經驗，有外資沽港股搵食，又唔會咁快走噃。所以依家大市 面

對幾種風險：

第一，美國金融海嘯搞唔掂的風險，雖然美國政府依家的策略是指鼻哥印銀紙入市，邊家公司唔掂就買起邊家，遲啲恐怕連有搞金融的通用電氣或無搞金融的通用汽車都買起埋，但無限量咁印鈔，赤字太驚人，恐怕又會觸發美元和美債的跌價危機。

第二，中國經濟下行速度好快，如中國政府不盡快加大財政投放的力度，明年經濟恐怕保唔到8%增長，有硬着陸之險。

第三，香港會被大鱷狙擊，如前所述，佢插得你一次，就可以插你第二次，明年乘住經濟轉壞，財赤大增，又可能會來提提款。近日大量美元流入香港換港元，表面 看是香港有存款保險，港息又高過美息，所以熱錢流入賺息差，但我怕熱錢其實留在這裏等機會，到時機成熟時一舉外流，就可以再抽高拆息，隊低股市。在呢個情 況下，國務院昨日便宣佈出十招，在兩年內動用四萬億人民幣擴大內需、刺激經濟，看來內地經濟「硬着陸」機會將會大減。

阿爺十招防硬着陸

講咗三大風險，不代表我極度看淡，我認為港股有危亦有機，高唔好追，插低唔怕買吓。上面講的三大風險，美國情況最惡講，百年一遇的金融風暴，乜都有可能發 生，但既然股神巴菲特和碧斯都估美股見底，我哋亦唔好睇得太淡。香港被狙擊不可不防，所以你問係唔係一定唔會穿10,000點，我都話講唔定。

專揀殘股慢慢吸

由依家到明年第一季，香港經濟都會幾難捱，即使光明就在前面，過程都幾惶恐。碧斯的揀股策略可以參考，佢話會買航空股和投資銀行股，呢啲都係跌得好殘的股 票，正所謂黃台之瓜，何堪再摘，長線投資者亦可以搵一些有一定質素的狂插股，估吓佢會唔會執笠(國有股安全啲)，若估佢唔會執，睇住佢的一年低位，每當跌 近這些低位時，不妨小注買吓，慢慢儲貨，高唔好追。咁樣未必可以買到最低價，但亦應該唔會買到貴價貨。花三個月至半年去建倉，期以五年，應有所獲。

<<轉載自香港經濟日報>>