陸 羽 仁 - 金 融 High Tea (25/11/2008): 大抽水、大泵水、銀行缺水

美股上周五尾市後抽近500點，重上8,000點，國內未有任何救市動作，港股昨日未有跟隨美股上周升勢，大市缺乏明顯方向。恒指低開420點，之後反覆 回升，上午早段最高曾倒升48點，隨後掉頭回落，在不足200點之間窄幅爭持。恒指收市報12,458點，下跌201點，跌幅1.6%；國企指數收市報 6,377點，跌幅0.8%，大市成交只得350億，為20個月以來最低。期指收市報12,485點，下跌31點，高水27點。

只睇巨股大市唔係幾靚仔，龍頭股滙控(005)及中移動(941)均成為沽售對象。

美國花旗集團公佈獲美國政府注資打救，未對大市有很大刺激，渣打(2888)要大折讓供股，更令金融股受壓，滙控股價最低曾跌至73元，創七年以來新低， 收市報74.75元，下跌3%，又穿上次低位75元；中移動開市跌穿65元，報64.9元，收市報66元，跌2.2%，兩隻重磅股推低大市近90點。

低價供股焗 住跟

金融類股票普遍捱沽，中銀香港(2388)下挫7%，恒生(011)雖然表示無意裁員或考慮凍薪，下跌2.4%，東亞(023)跌1.8%，銀行股無厘神氣。

到下午渣打宣佈供股計劃，以每股45.11元，按每91股供30股方式，供股集資17.79億英鎊(約207億港元)，以增強資本水準，強化資產負債表。 渣打申請停牌，停牌前挫6.38%，最後成交價88元，渣打供股價45.11元，較停牌前價格折讓48.7%，較股本重組後的理論除權價折讓41.6%； 渣打最大單一股東新加坡淡馬錫控股(Temasek)已承諾按比例供股，淡馬錫如今持股18.8%，它是供股包銷商之一，理論上最多可增持到22%，但若 外國主權機構持有香港發鈔銀行超過20%股權，該銀行將不能保持發鈔地位，所以預計淡馬錫不會增持渣打至20%，又或者當局放寬有關規定。

英國政府有救銀行計劃，皇家蘇格蘭銀行和HBOS已要求英政府注資入股，但渣打未要求英國政府泵水，可見佢雖然缺水，但未需要行到最後一步，情願向股東伸手，都唔向政府伸手，以免伸手後要受政府限制，公司發幾多花紅都要政府點頭。

據美林早前發表的報告，渣打的資本充足率約為6.1%，要在年底前增資32億美元(250億港元)，才可將資本充足率提升到8%的要求水平，今次供股集資210億港元，接近一步到位滿足資本要求。陸羽仁一早話渣打缺水，不過唔知佢最後以供股方式抽水解決問題。

有手持渣打的朋友問我供唔供好，我話渣打今次以大折讓48%供股，股東只有焗跟，理論上股東唔供可以把供股權賣出，但只怕股價再插吓，到派供股權時價值亦 會大跌。但細戶唔供大戶會供，唔供股的散戶股權就被人低價買股攤薄。朋友再問會唔會供完股佢再跌穿供股價？我只能話在花旗都可以跌到3.7美元一股的時 代，真係乜事都會發生，供咗股都要預咗長期作戰。

政府出手效 應唔長

本地股民較關心渣打，但真正大新聞係花旗，佢終於趕在美國星期一開市前和政府傾掂打救佢的細節。美國政府公佈救花旗的方案，處理掉花旗4000億問題資產 中的大部份，政府承諾擔保3060億美元，而花旗自己就承擔當中的290億美元，即係超過290億美元之上的損失，即係由政府包底，花旗輸極都有一個清晰 的數目，可以一筆過撇掉這290億美元，就有一本較乾淨的帳簿，希望可以重新上路。滙控主席葛霖昨晚接受彭博社訪問亦都話，不排除會有集資需要，該集團兩 周前資本仍然充裕，未來將視乎需要檢討資本要求。他又證實，正洽購花旗部份資產。

美國政府向花旗注資200億美元，認購花旗的優先股，以充實花旗資產，政府因擔保花旗債務額外多取70億美元優先股，即係夾埋取了270億美元優先股，夾 埋早前政府注資換取的250億優先股，美國政府合共擁有520億花旗優先股，收取8厘年息，即係花旗將來一年都要俾42億美元利息俾政府。

從花旗股東來說，政府的拯救方案已是一個筍盤，因為讓出270億美元的優先股，先取回200億美元政府資金去填撇帳的黑洞，而且亦叫政府擔保3060億美 元的債務，如果最後這筆債唔見兩成，政府都要損失612億美元，美國係唔可以忍受花旗死掉，所以先至咁鬆手。不過花旗要美國政府入股都有代價，因為政府限 咗未來3年花旗若俾唔到優先股利息，就唔可以派息多過1美仙俾普通股的股東，花旗好有機會變低息股。

在市場大缺水的前提下，需要救的公司還陸續有來，美國政府救完貝爾斯登、房利美、房地美及AIG後，今次又救花旗，但恐怕救市的刺激作用會愈來愈短癮，正所謂金融海嘯，黑洞難填也。

<<轉載自頭條日報>>