陸 羽 仁 經 濟 (05/01/2009): 控制風險長炒長有

新年伊始，投資者要好好檢討自己的處境，分析好形勢，為未來作好部署。

網友有些關於投資的提問，可以睇睇，網友daidai問︰「港股已離10月的低位10676點相差近4、5千點，而更有技術分析指2009年上望21500點，您睇淡嘅決心有否動搖？需否作出更改或作兩手準備？」

股民買股票，會相信成功之道是作準確之預測，然後在最低位買，在最高位沽，我會叫估得咁準的人叫「估神」，若然次次咁準，必定如有神助，但呢個世界有無 「估神」呢？唔係無，而係好難長期都咁準，我之前都講過，有個鬼仔搞咗個技術分析模型，在87年成功預測美股大跌，佢一舉成名，變咗揸盤人，但最後無估中 過，結果都幾潦倒，所以唔係唔估，而係唔可以完全靠估，以及唔可以認為自己實估得中而博到盡。相反地，關鍵是要控制自己估錯時的風險。

外圍經濟差難言見底

投資股市當然要對市場大勢有個基本判斷，要睇走勢，要知道依家係牛市還是熊市，牛市走勢一級級向上，熊市走勢一級級向下，知道大方向，買股(或沽股)無往 而不利。如果大方向轉咗都唔知，就會話「跌到21000點係跌無可跌」(呢個世界邊有話股市到咗乜嘢位係跌無可跌)，又或者話「未離場唔算輸」，呢啲說話 「好有散戶feel」，要戒。

至於Daidai的問題，單係睇圖，港股的確有啲向上的走勢，但受制於15000點高少少的水位，未能上破確認升勢。港股長綫走勢不能脫離美股，杜指炒上 落市的走勢比港股更明顯，向上不能破兼企定在9000點樓上，向下在8000點又有支持，在1000點之間炒上落，現時只是橫行待變，以美股的走勢論，未 能確認已經見底向上。技術走勢要配合基本因素分析，美國經濟亦未見底，好難話股市三個月前的一跌已是熊市的終結。

走勢背馳宜轉軚斬纜

不過，我做人的態度是信市場，唔信自己，如果未來見到美股一級級上，突破完9000點，再上 10000點，一級級咁向上，就出現一種牛市徵象，若經濟數字亦配合，到時我會隨時轉軚。正如今年5月美股一度出現調整已見底的假象，那時恒指約 26000點，我都未放棄牛市的假設，但到6月大市一級級落，美股敗象已呈，到7月已確認是熊市，那時港股還有23000點左右，反手造淡，還有大把水 位。

唔好堅持自己預存的假設，要由市場的走勢來證明你的假設是對是錯，若然是對，繼續加注；若然走勢和自己的假設背馳，而且背馳得愈來愈厲害，就要轉軚斬纜，若是炒家，更加要反手做番突。要控制自己睇錯市的風險，才是長炒長有之道

港股上升恐熊市反彈

我目前的假設無變，大市之升只是熊市的反彈，股市不能插個不停，大戶係由股市波動中賺錢，造淡又食你，造好又食你，佢食完就走，跟住就反手。這些人為波動就造成走勢的陷阱，令人迷惑。

除了分析大市走勢，更重要是分析自己的處境，睇住自己的環境來控制風險，爭取長綫取勝。股場險惡，唔好以為自己一定啱，要假設自己會錯，諗吓如果自己錯會 點，睇住自己的處境，睇錯咗頂唔頂得順，控制風險，股市開到你同我死嗰日都有得開，日日都有得炒，記住要保住條命仔，長炒長有喎。

<<轉載自網誌>>