陸 羽 仁 - 金 融 High Tea (05/01/2009): 娓娓之音

港股上週五在09年首個交易日反覆造好，在收市前「勁假時段」升至全日高位15,042收市，大升655點；國企指數升422點，報8,314點，大市成交只有305億元。

期指收報15,039，升634點，比現貨低水3點，成交44,908張。

美股在09年首個交易日亦報升，通用汽車得到首批註資，加上油價上升利好能源股，杜指大升258點，升幅2.9%，升到9034點，杜指又上穿9000點，升上兩個月的高位，睇嚇今次企唔企得穩喺9000點樓上啦。

這是傳統的1月效應，基金年底時勒住勒住，以保住全年戰果，贏的希望捱到年底有一個良好的業績，輸的也不希望傷口擴大，加上放聖誕假，所以12月大市比較 沉悶，到新的一年開始，睇好大市的基金就開始吸貨，繼續新一年的搏殺，所以1月頭會有一浸買盤，加上奧巴馬1月20日上任前的期望效應，都會吸引人買嚇 貨，等這些買盤買定之後，才能看到是虛火還是真火。

生意反彈掟貨不停

最近同幾個做生意的朋友傾偈，不少人看法極悲，主要不是因為他們「睇得悲」，而係生意前景「實在好悲」。有一個朋友做廠，話美國生意縮得好快，他的工廠都 係開一半工，養住班工人，月月蝕，唔知頂得幾耐。佢話東莞廠唔算最慘，在山東的韓國廠仲慘，工廠成千上萬地倒閉，佢地唔止生意少，成本升，仲要捱南韓圜大 跌之苦，一年前每美元兌930韓圜，而家跌到1316圜，兌人民幣仲傷，由每人民幣兌128圜，跌到依家190圜，即係人民幣兌韓圜升值咗48%！韓國廠 如果唔賺錢，廠商要由韓國搬錢到大陸貼，真係入曬肉，好惡頂，所以好多韓國廠家棄廠而逃，間廠都唔要，攞起現金就走。內地近排大力打擊非法撤資、打擊地下 錢莊，就係唔俾廠家套錢走路，跟住就要由地方政府執手尾，貼錢送工人返鄉，睇到呢啲情況，就知道內地出口生意熄火之勢極嚴峻。

另一個朋友做珠寶出口生意，佢自己已經好叻，早兩年已經睇到美國次按問題好大鑊，儘量少做美國生意，轉戰歐洲，點知一樣中招，因為美國唔掂拖死埋歐洲。這 還不止，佢自己本來做生意好穩陣，控制住存貨不致太高，但係好多行家唔係咁，積咗大量存貨，死之前唯有掟貨出街，結果就搞到啲價錢賤曬，最近個市銷情略有 反彈，但由於太多行家跳樓貨，價錢一樣上唔到，但行家照樣出貨，等到呢一浪銷售反彈力都消耗埋，佢估大市會變為死寂，到時想出貨都無機會啦。

我問佢哋點解睇外國生意睇得咁差，佢哋話美國佬自己都唔睇好，香港人點敢睇好？佢哋提到候任白宮經濟顧問薩默斯估計，09年美國的失業率會升到10%！薩 默斯早前在《華盛頓郵報》上發表一篇文章話，「今日許多專家深信，明年底(2009年底)，美國失業率可能上升至10%，我們的經濟距離滿載的產能，可能 落後達1兆美元，相當於每一個四口之家收入減少1.2萬美元。」失業高昇衰足全年？

美國現時已公佈的去年11月份失業率升至6.7%，創下15年最高紀錄，但薩默斯講今年底失業率升到10%，即是還要再大增3.3個百分點，以美國這樣一 個成熟經濟體來說，這種失業率增幅十分驚人。幾個朋友望住薩默斯講的10%失業率發曬愁，雖然佢咁講可能係做「期望管理」，讓美國人降低對奧巴馬新政府的 期望，佢亦可能先唱淡，為奧巴馬提出7750億美元搞基建救市大計鋪平道路，但無論如何，佢係候任白宮經濟顧問，人人都估奧巴馬在2010年會搵薩默斯接 替伯南克做聯儲局主席，所以薩默斯唔會亂講嘢，佢都睇得咁淡，跟住佢去估計今年全年美國生意都唔好，亦是正路部署。而且美國以基建救市著眼於中長期，所花 的錢唔會馬上全部在GDP反映番出來，所以亦唔可以預計今年美國經濟增長數字會好，搞不好可以一年四季GDP都係負數。

幾個做生意朋友都關心一個問題：生存，佢哋認為1997金融風暴、2000年科網股爆破、以及2003年沙士危機，對實體經濟影響無咁大。97年只是亞洲 有事，美國仲好好；2000年係股市爆煲，美國經濟無爆，仲受惠於減息而急促反彈；03年沙士則是罕見瘟疫，好快就過去，之後經濟好快回覆番常態。但呢次 好似走入一條暗黑隧道咁，未見到盡頭。當大家估個市跌幾個月就無事，即使要輸錢，都易頂好多，銀行都願意賠你頂；但當人人都估個市有排復元時，真係唔知點 頂，例如話大地產代理公司一個月蝕3000萬，蝕幾個月無壞，如果話要蝕一兩年，一年失血3億，好易威脅到生存，一則股東有無咁多水去頂，二則銀行都未必 會陪你頂，只要一斬信貸額度，一無血到，公司就會摺埋。所以幾個老友都全力出貨套現，大減成本，希望可以捱過呢次嚴冬。

大戶善奏海妖之歌

幾個做生意的朋友不約而同咁問，佢地覺得美國經濟咁差，香港經濟咁差，點解近排股市仲有得升呢？陸羽仁話 做廠我唔係幾熟，股市就易講好多。股市有週期，大、中、小週期都有，大週期行幾年，中週期行幾個月，小週期行幾日，而家大週期係熊市，但中週期卻炒緊反 彈，就出現經濟唔好，股市照升的怪現象。大戶就靠這些週期食胡，唔係炒單邊，落佢又炒，上佢又炒，你唔信牛市已死時，佢就來一個大插插，好似股神巴菲特咁 講，一個大浪衝過來，浪潮過後，就知道邊個無褲著，當然多數係做好友散戶被人沖甩條褲。好啦，到你開始信佢係熊市，全力造淡時，佢又來一個大夾夾，夾到你 唔信的高度，散戶又輸。等你開始信係牛市開市時，11000點、12000點唔買，去到15000點、 16000點才去買時，佢又來料，又來一個大插插，散戶再輸。幾個浪頭過後，都無乜散戶有褲著㗎啦。

大戶最厲害那招是唱出娓娓之音，搞到你迷惑之極。大詩人荷馬在史詩《奧德賽》裡，講到希臘遠征軍大將尤力西斯(Ulysses)乘船返鄉，事前已得到女神 忠告，他們將會遇上一個劫難，就是在聽到海妖「賽蓮之歌」，賽蓮的歌聲如泣如訴，輕吹入耳，航海人本來就有思鄉病，受她們的歌聲吸引，從此沉迷其中，不再 懂得回家。尤力西斯早有準備，自己和船員預先把蜜臘塞入耳中，避開賽蓮的娓娓之音，逃過一劫。

過急瞓身長夜難捱

股市亦有很多賽蓮，喜歡作各種預測，她們吹起摩笛，唱出娓娓之音，時而精確，時而誤導，就如海妖賽蓮的歌聲一樣，甜美動人，導你升仙。例如油價100美元 時佢睇150美元，去到140美元時佢睇200美元，你直跟到尾，唔識回頭，就走上了不歸路。投資者要自己學習作出判斷，要睇清楚大方向，股市的大方向係 牛市或熊市，要分清基本的市道，熊市的反彈有時和牛市的初升好類似，你哋就要自己判斷，係唔係咁快會變得好好呢？假設長線投資者要把握機會在2009年熊 市的時機入市，但只能在大跌後才去買，不要在升市時追，慢慢等，急不來。

股市難測，經濟易睇，先睇美國，再睇香港，若果候任白宮經濟顧問薩默斯講2009年年底美國失業率會上到10%係真，咁就唔好咁快瞓身睇好，如果美國在去 年9月已見底，股市跑快經濟半年，即係今年四月開始的美國第二季GDP應該有正增長，但GDP在上半年已轉為正數，美國在今年年底又何來10%的失業率？ 若美國經濟真係有排未掂，香港經濟有排都未好，即係話去年股市之底未必是底，對股市要非常審慎，短炒無妨，速來速去，投資未得，太快入到滿倉，若果股市回 落，長夜難捱呀。

<<轉載自頭條日報>>