陸 羽 仁 經 濟 (08/01/2009): 安龍騙局

港股插完美股真係跟住插。美股受龍頭企業裁員和調降盈利預測，以及日益惡化的就業形勢打擊，杜指走勢惡劣，開市已跌穿9,000點大關，並於五分鐘內急插158點，之後略為反彈45點已支持乏力，杜指重拾跌勢，一直跌至全日最低的8,720點，接近收市才喘定。



杜指收市報8,770點，大跌245點或2.7%，為去年12月1日以來最大的低幅，09年的升幅亦差不多一鋪清袋。杜指全日最高8,997點，最低 8,720點；標普500指數報907點，跌28點或3%；而納指表現最差，跑輸大市，下跌53點或3.2%，報1,599點。紐約證交所成交12.3億 股。美股守唔住9000點，看來又會展開一浪向下調整。



「新年」效應隨著時間淡化，市場上壞消息此起彼落，投資者的樂觀情緒備受打擊，終於回歸現實。繼美鋁(Alcoa Inc.) 昨日宣佈裁員13,000人後。APD企業服務組織(ADP Employer Services) 報告顯示，佢地調查12月份美國職位縮減69.3萬，遠高於預期的49.3萬，為2001年有調查以來的新高，預計勞工部本週五公佈的失業數字會大升。再 加上原油價格受能源部公佈每週庫存上升多過預期的消息影響，加上以色列誤炸加沙的聯合國學校有機會促使提早停火，油價大跌至每桶42.37美元，一日急跌 12%。油股顯著下挫。艾克森美孚和雪佛收報78.25美元，下跌2.6%和73.96美元，跌4.4%。



時代華納兩大龍頭企業齊發盈警。時代華納第四季因營運成本大升，預警2008年會有虧損。股價大跌6.3%至10.29美元。美國晶片巨擘英特爾 (Intel)週三對第四季營收發出第二次預警，話個人電腦需求較佢擔心的還要疲弱。英特爾將其第四季營收預估調降至82億美元，11月時該公司已預警第 四季收入約為90億美元，10月時曾預計營收為101-109億美元，即係話預測愈調愈低。



Solaris資產管理公司的分析師Tim Ghriskey話，英特爾明顯將進入企業盈利的悲慘期，它是業界領頭羊，它的跌幅將拉低整個行業。 英特爾股價收挫6.05%，觸發市場對科技公司的普遍憂慮，該行業其他公司股票也大幅跳水。費城半導體指數重挫4.9%。分析師話，經濟疲弱之際對個人電 腦的需求放緩，不可避免將衝擊個人電腦、晶片和軟體廠商的獲利。他們估計消費者開始轉向購買更便宜的筆記本型電腦。



金融海嘯害死人的消息陸續有來，在德國鉅富麥克勒(Adolf Merckle)瞓火車軌自殺的同一日，波士頓地產拍賣商Steven L. Good在波士頓市郊自己的積架車內吞槍自殺，沒有留下遺書，估計也是不堪生意失敗而自殺。佢係波士頓地產商協會前主席，旗下公司是波士頓最大的拍賣行。 Good死時52歲，子承父業，其家族公司過去50年經手做了90億美元的地產成交，一場金融海嘯，一樣頂唔順玩完，呢一浪好多有錢佬中招。



講起中招，都未夠印度的科技大王Ramalinga Raju咁誇，佢爆中繼馬多夫事件之後最大的金融醜聞，馬多夫搞的是龐氏騙局，佢搞o既係「安龍騙局」，大家都知安龍曾是全球第二大營業額的公司，後來爆 出全是假帳。呢個Ramalinga Raju的Satyam Computer Services Ltd，係印度其中一間最大資訊科技公司，佢昨日宣布辭去公司主席一職，並承認製造逾10億美元的假賬，公司的資產和盈利全部係假嘢，消息令印度股市發生 大地震，SENSEX指數單日大瀉7.3%。



呢個Ramalinga Raju間公司個名叫Satyam，名字的意思係真實咁解，呢個故事教訓我地，逢係話自己老實的人，十個有九個都係古惑，真係老實人就唔使以「老實」兩字作招牌。



Ramalinga Raju上個月曾經想將私人持有的兩間公司買俾自己的上市公司Satyam Computer，真正的動機唔係想滾上市公司錢，而係透過這個安排把504億盧比(10.3億美元)假資金注入上市公司內頂數，但股東反對這個收購私人 公司行動，Satyam的假帳再遮掩唔到，終於爆煲。



紙包唔住火，Ramalinga Raju自己向印度交易所寫信自爆，佢自己話公司的536億盧比現金和504億盧比銀行存款，其實並不存在。佢公司話經營的毛利率有24%咁高，其實只得 3%，公司話營業額有270億盧比，其實只有210億盧比。呢個假局能夠頂得住，全賴老細Raju把自己的股票按俾銀行，借咗123億盧比現金來頂住，玩 緊o既係「十個茶煲三個蓋」的遊戲。Raju話呢個假局現咗好多年，佢就好似騎住一隻老虎一樣，唔點識樣落地而唔會俾老虎食咗。



Raju營運咁大間科技公司都爆煲，令印度科技業和企業管治聲譽受重創，一間公司可以假，其他公司仲信唔信得過呢?



唔好淨識笑人，香港有咁o既公司一啲都唔出奇，好市的時候，唔會爆煲，漫長的熊市好易令做假的公司水落石出，各位老友執生啦。

<<轉載自網誌>>