陸 羽 仁 - 金 融 High Tea (09/01/2009): 超人沽貨要醒水

港股插完再插，恆指昨日低開231點後繼續尋底，接近14,500點才找到初步支持，但反彈後再插，中午已跌穿14,500點，10天及20天移動平均線均告失守，下午繼續插至14,334點後低位爭持，尾市跌幅略為收窄。

恆指收市報14,416點，跌572點或3.8%，期指收報14,430，跌634點，比現貨高水14點，成交65,167張。國企指數再次跑輸大市，下挫485點或5.9%，報7,760點；大市成交555億元，跌市成交都唔細也。

昨日拖住大市急挫的是中資群英，帶頭的是中移動(941)，跌3.1%，帶動港股跌64點，其餘一眾內銀股和石油股都係領跌火車頭。中環茶友話，論走勢港 股相當唔靚仔，連續兩日急跌，將過年後的升幅一筆勾銷，港股升又升得急，跌又跌得急，在圖表上好似一個山仔咁，好快就跌近14000這個重要支持位，大市 如果守得住此位，就可能仍然炒緊14,000點至16,000點的上落市，若穿埋14,000點跟住上唔番，小心又有一輪調整。不過佢話短程而言，照理跌 兩三日都要先彈一彈啩。

散戶追貨入籠

最唔好的現象係有一班散戶入咗老鼠籠，經紀張話，新年後大市急升，紅色股升得好好，愈來愈多散戶相信牛市已到，前日上午傳緊美銀批建行(939)，但散戶 一見工行(1398)回少少就去追，4.2元掃貨，經紀張想拉都拉唔住，到昨日收3.69元，已經唔見咗12%，但佢哋唔單止唔斬，仲話跌到14000點 加注，再跌到13000點再加注咁話，聽到經紀張心中發毛，呢啲散戶依家心中相信牛市已到，所以講到咁豪，若果真係跌到13,000點時，散戶又會變死 狗，又要去「打電話問功課」了。經紀張話，希望唔好俾佢自己把衰口講中。

敲三次門只好買

昨日中環午飯最多人談論的不是美銀沽建行，而係李超人都沽中行(3988)。李嘉誠基金以每股作價在1.98至2.03港元之間，配售20億股中行股份， 佔持有股份40%，套現金額約40.6億港元，是次減持該基金帳面淨獲利最多達18億元。美銀沽220億元建行，唔及李超人沽貨套現40億咁惹人注目，美 銀等錢使，有得沽就要沽，但李超人個基金會有水，依家沽貨，似乎唔多睇好後市。記得李超人上一浪沽航運股沽到個靚價，後來散戶都非常揼心，悔恨無跟李超人 出貨，今次李超人又嚟料，大家都打醒十二分精神留意。斷估若李超人認為牛市已到，就唔會今日走去沽貨啦。

千祈唔好以為李超人係「淡怪」，經常看淡，相反佢係「撈底王」，八十年代趁底買石油公司赫斯基，至今仍為人津津樂道。聞說佢對美國呢個浪有套理論，認為要 買平嘢，有經紀第一次來敲你門叫你買嘢你唔好買，第二次來敲你門都唔好買，要等到第三次來敲你門至好買。當然咁講唔係真係要數三次，而係佢認為呢次金融海 嘯會跌得好深，會一浪一浪咁跌，太早出手，就未能買到平貨，買得早仲要捱價。如今見到李超人仲係度沽中行，似乎可以肯定，第三次敲門的時機未到。

市場玩緊估領袖遊戲，估吓下一次係邊間內銀股俾人沽，目前蘇格蘭皇家銀行仍持有209億股中行股份，亦有沽售壓力；淡馬錫持有中行的104億股股份，亦已期滿解禁，相信中資銀行股的沽售潮，有排都未完。

內地發3G牌的負面角度慢慢浮現。交銀國際電訊行業分析師李志武話，內地電訊股面臨的挑戰大於機遇。因為電訊公司3G的投資仍會加大，3G收費又較2G為 低，將影響盈利能力，3G發展亦未必會如預期般理想。該行短期看好中移動，長期而言則以中電信(728)較佳，另建議「買入」中興(763)及 A8(800)。

我就話3G對三大電訊股唔係好消息，只係對設備股係好消息，中移動獲國產3G，雖有阿爺政策支持，但無論從技術質量和未來手機選擇都大受限制，係一舊大豬 頭骨，聯通(762)和中電信獲歐洲和美國的3G制式，技術條件和手機選擇都好啲，但阿爺又擺明想扶持中移動的國產3G，國產3G唔掂，阿爺亦會拖住其他 兩家公司的歐、美制式發展，一定唔會畀佢哋隊低國產3G，單係咁講已經係泥漿摔角，都未計3G推出隨時觸發價格大戰，所以內地電訊股會進入一段不明朗時 期。

<<轉載自頭條日報>>