陸 羽 仁 - 金 融 High Tea (13/01/2009): 殺近崖邊 好友腳軟

美股上周五因去年12月份失業率錄得16年以來的新高，杜指連續第三天下挫，港股昨日跟外圍低開，恒指開市後反覆下滑，早上近50天移動平均線 14,150點都失守埋，跌近14,000點大關前才喘定，午後14,000點大關迅速失守，尾市跌幅略為收窄，恒指收市報13,971點，跌406點或 2.8%，期指尾市隊番高少少，收報14,020點，叫做收喺14000點樓上，跌241點，比現貨高水49點，成交70,543張。國企指數再次跑輸大 市，下挫413點或5.3%，報7,311點；大市成交462億元。

恒指已是連續第五天下跌，連14,000點都穿埋，近日最低殺到13,895點，距離12月24日的低位13,855點，只差40點咁大把。中環茶友話， 呢一浪回得又快又急，中間連全日反彈都無，睇圖論走勢都幾差，好快就把好友殺到崖邊，佢哋要防守的不止係上浪低位，亦係去年10月大跌市以來反彈浪的上升 軌，好友你都咪話唔腳軟，如果連13,855點都插穿埋，咁就連上升軌都插穿，真係有機再試低位，所以好友食粥食飯睇吓守唔守到大位啦。

放自由行無咁早

國企指數連續兩天跑輸大市，跌幅超過5%，工商東亞的韓致立預計，H股指數下一支撐或在心理位7000點。市場不斷揣測何時再減息及調低存款準備金率，但 阿爺上周仍未出招，加上內銀股被主要股東減持的消息困擾，中資金融及銀行股顯著走弱，「三保六行」全線向下，國壽(2628)跌3.6%、平保 (2318)跌7%、財險(2328)跌6.3%；六行各跌3至6%。

市旺搵嘢炒，市淡搵嘢插，濠賭股就係一個例子，國家副主席習近平訪問澳門，連順口溜都講埋，留下「只要精神不滑坡，辦法總比困難多」十六字真言之外，任何 利好澳門賭業的消息都無。上周炒作習近平訪澳炒得如火如荼的濠賭概念股，本來期望習副主席下來派吓糖，放啲自由行到澳門，最後只係出吓口術，就大叫一聲散 水。澳博(880)、新濠(200)、澳瑪娛樂(959)及信德(242)分別大跌10%以上；銀娛(027)更大瀉近兩成。高人話，炒阿爺放自由行唔使 咁早，七月澳門選特首大選舉團的選委，近年中阿爺先至放水都未遲。

我之前已多次講過，跟炒概念股就如「刀鋒舐血」，千祈唔好瞓身，去博就要轉身快。昨日聽股壇叔父講，好多本地大戶資金仍然睇淡，唔大跌唔想入市長線投資， 所以有錢只係短炒，兩三日走一轉，通常都係睇住大成交，炒吓概念，好多時睇吓內地有乜政策有乜消息，入去食一轉就走，有時快到上午入，下午走，資金流轉得 快，所以不時有無厘頭升10幾巴仙的情況出現。

陸東都唔敢睇好

大口喉快來快閃，散戶跟風入市搵原因，隔咗一日，睇完報紙，搵到「疑似」上升的原因，施施然入市，其實已遲了一兩日，佢哋唔知本地大戶咁短癮，到佢哋入市 時大戶已走咗，好多時散戶入齊時，大戶走得七七八八，其實只是一個散戶派對，所以有乜風吹草動，隻股亦散得好快，因為根本無人維持秩序，只是自由飛行。

一直係好友的瑞銀財富管理及證券顧問陸東，維持今年恒指20,000點預測，但認為農曆新年後會下試12,000至13,000點，但不會重返去年 10,676點的低位，佢仍然認為去年已經係熊市見咗底。佢話企業盈利下跌，風險溢價高企，調整未完成前股市不會大升。陸東預料本港經濟在下半年或第三季 見底，失業率升至6%，對樓價有負面影響，中小型樓宇跌幅大過豪宅，但不會重返沙士價。

陸東一向係大好友，依家連佢都話農曆年後要再試低位，咁好友陣營個勢又真係幾弱喎。

<<轉載自頭條日報>>