陸 羽 仁 - 金 融 High Tea (14/01/2009): 好友投降任人玩

美股持續偏軟，昨日亞太區股市下跌居多。恒指早段反覆，低開41點，隨即再下滑70點至13,860點，之後一度倒升近260點至全日最高的14,119 點，但市況再度回軟，跌至13,921點後在14,000點窄幅爭持至中午收市。午後內地傳出惡劣的貿易數據，A股下插，港股好嘅唔跟醜嘅跟足，恒指跳水 285點才回穩，之後繼續橫行尋底，在「競價時段」再被推低25點，跌逾300點至接近全日最低位收市。

恒指收市報13,668點，跌303點或2.2%；期指收報13,569點，全日跌451點，比現貨低水99點，成交76,381張。國企指數繼續跑輸大市，下挫231點或3.2%，直插7,000點心理關口，收報7,081點，大市成交472億元。

穿大位兵敗 如山倒

港股昨日初段扮晒反彈，又引咗一班即日鮮博反彈者追貨，怎料來一記回馬槍，好友全軍覆沒，恒指跌足6日，無一日反彈收市，愈跌愈有，如今連12月24日的近期低位13855點都破埋，論走勢無險可守，好樣衰。

中環茶友話，今年頭幾日升得太靚，幾日升咗千幾點，令不少散戶認為牛市已到，飛身追貨，當時大市上升反覆試15,800點，結果在15,500點樓上鎖住 一大批人，大戶派夠晒貨，如今跌番2000點有多，夾住一大批好友，昨日一穿13,800點，部份好友見支持位失守，兵敗如山倒，棄械投降平好倉。

茶友話，大戶夾住好友散戶玩，現在有2000點在手，要食胡夠位食胡，狼啲再插下去食深啲又得，好友極其被動，被人夾到進退維谷，處於一個生殺由人的任人玩處境，隨時係等夾到大量好倉認輸平倉時就回頭。

經紀張的散戶客仔情況，就反映了好友的困境，當大市殺上時，個個散戶以為唔買走寶，好多人唔係追內銀股，就係追香港地產股，例如佢有幾個客追隻工行 (1398)一個月高位4.5元，昨收3.41元，個別咁唔好彩摸頂買又唔識止蝕，已經唔見咗24%。經紀張一早叫啲客唔好追，無人聽佢講，如今衰咗，又 日日「打電話問功課」，日日問經紀張點算。經紀張都唔敢答，15,000點佢敢叫啲客唔好買，而家連跌6日跌到13600幾點，佢唔敢叫人斬倉，怕隨時一 斬完倉就彈，佢實俾人媽叉。經紀張都識講，而家個市跌多1000點又得，彈番1000點又得，邊個話得埋。

不過我話，呢一浪咁急跌落來穿晒位，將兩三個月反彈浪向上的走勢打破，上升軌穿咗，即使反彈，未來唔大插偷笑，保得住一個上落市都唔錯啦。

經濟數據唔靚仔，內地公佈上月出口1,111億美元，下跌2.8%，為1999年4月以來的最大低幅，出口明顯萎縮；入口722億美元，大跌21.3%， 由於入口跌得多過出口，所以有貿易順差有390億美元。內地專家估計1、2月出口跌得仲急，貿易盈餘未必維持得到。內地出口差，會拖住香港經濟向下。

大摩睇好美 元

美元急彈，反映美元兌六種主要貨幣匯價的美元指數急升上83.43，美元指數在去年11月12日升上88.46高位後，反覆急回，在12月一度跌落 78.33的低位，昨日的反彈相當急。商品價格回落，金、銀、銅、鋁等價格全線下跌。黃金每盎斯最新報819美元，比上日收市跌36美元。金礦股紫金 (2899)、招金(1818)跌3%、江銅(358)跌7%。油價反彈浪好短命，最近連跌5日，紐約原油報每桶36.44美元，較上日收市跌逾3%。油 股全線下挫。中海油(883)跌3%、中石油(857)跌3.9%、中石化(386)跌3.8%；石油設備股中海油田(2883)跌5.6%。

美元升、商品跌，兩者有相關。摩根士丹利貨幣策略師StephenL.Jen在倫敦發表佢對美元的最新看法，睇好美元，佢特別睇淡歐羅，佢話全球要對付兩 種震盪，一種是資金流通性的震盪，一種是實體經濟衰退的震盪，他認為兩種震盪都對美元有利(流動性震盪加劇時資金到美國債市避險，實體經濟震盪美國行先一 步)，去年12月資金流通性震盪稍為紓緩，但實體經濟震盪在默默加深中，美元因而短期回落，但實體經濟的震盪將會加劇，美元相對亞洲貨幣(日圓除外)和拉 丁美洲貨幣會再創新高；而全球經濟放緩對德國的影響很大，所以現時的歐羅匯價過高，十分脆弱，歐羅兌美元匯價昨日跌到1.329的近期低位，但佢估歐羅在 未來幾個星期會跌番落1.2幾的水平。只有日圓匯價比較強硬，會升至85圓。

<<轉載自頭條日報>>