曹 仁 超 (14/06/2008): 印度就快頂唔順

　　6月13日，周五。恒生指數跌431.56，收22592.30；成交減少至590.7億元。6月期指低水，跌660點，收22446點。
　　今天中國鋁業（2600）跌2.5％，成11.08元；重慶機電（2722）新上市較招股價1.3元跌19.23％，收1.05元；中國遠洋（1919）跌8.4％，收18元，因波羅的海指數急挫8.7％，而中國下令港口減少鐵礦砂存量。北控水務（371）跌46.8％，收1.94元；該股6月4日停牌，今天才復牌。
　　豐控股分析員Richard Cookson建議投資者手上現金由6％提升至11％，亞洲新興市場股票減至零。
　　外國銀行向發展中國家貸款由2002年11000億美元上升到2007年年底40000億美元。如一旦收緊影響十分大。
　　Cube Capital Group共同創辦人之一Francois Buclez認為，瀕臨違約債券風潮正吹向亞洲，估計今年有800億美元債券將重新融資，包括連結股票ELN及未上市前股票。根據摩根大通亞洲信用指數，亞洲公司債券利率較美國公債平均高出206個基點。隨信貸市場收緊，有更多人將被迫出售資產。
　　滬深三百3000點失守，今天跌3.42％收2979.12，出現連續八個交易天陰燭，係十二年內最長一次跌市。海通證券跌10％、中國遠洋跌7.46％、中信證券跌7.77％、中國鋁業跌7.12％、中海發展跌9.15％。上證指數3000點失守後繼續尋底。
印度係第二個越南？
　　油價由紐約商品交易所2001年11月開始有期油合約買賣時17.45美元一桶，上升至最近139美元一桶，升幅達697％，超過納指由1992至2000年八年640％升幅。2000年3月至2002年10月納指下跌78％，令6萬億美元市值消失；油價上升697％後又點？由2003年至今投資者投入商品市場資金超過2500億美元，估計日後將減少，因美國樓市回落令各大銀行及金融機構撥備已達3900億美元。世界銀行估計，今年全球GDP升幅2.7％（去年3.7％），美國更只有1.3％（去年2.2％）。我老曹早已放棄分析油價方向，採取敬而遠之態度。
　　日本銀行宣布維持利率不變，仲係0.5厘，估計今年第二季GDP增長率可能降至零。雖然生產價格指數5月份上升4.7％（係近三十年升幅最大），但仍唔敢加息（今天日圓回落至108.08兌1美元）。
　　中國5月份零售數字上升21.6％，至8704億元人民幣（4月份升22％）。中國零售業仍一片興旺。
　　6月6日印度公布5月份CPI升8.24％創下新高，盧比自4月至今跌幅超過7％。為緩解高通脹壓力，6月11日印度央行自十五個月來首次將利率調高到8厘。6月12日印度股市跌幅近3％【圖】，印度最大銀行ICICI銀行跌3.8％，係2006年10月以來最低。
　　股市大幅下跌，通脹率大升，盧比貶值，再加上外貿逆差局面，一旦外資撤離，將對印度經濟帶來嚴重衝擊。經濟界在討論印度會否成為第二個越南？路透社12日及13日接連發表兩篇報道，認為整個亞洲市場都染上通脹憂慮症。尤其係印度企業以IT產品供應為主，面對主要市場（美國）訂單減少，盧比貶值7％係咪足以「拯救」印度IT企業？
　　中國人民大學經濟學院副院長劉元春教授接受《環球時報》訪問時，否定「印度將成為第二個越南」論，認為兩國經濟體制差別太大，無法比較。
　　5月份全球股市表現分歧好大。俄羅斯升12.8％、拉丁美洲升9.25％、東歐等升9.4％，但中國上海A股跌7.03％、印度跌8.4％、香港跌4.75％、台灣跌3.37％。資金正由大中華及印度，流向俄羅斯、東歐及拉丁美洲。
　　美國民主黨總統候選人奧巴馬提出，所有美國石油公司油價高出80美元一桶時，每桶石油額外收入須畀20％暴利稅（windfall profits tax），令油價一度回落，其後又回升。暴利稅唔會改變未來石油供求情況，反而會減少油公司勘探新石油資源。作為美國人應放棄SUV汽車，改為日本慳油小汽車；冬天不應再全屋暖氣，改用暖爐（只工作地點保持溫暖便可）。冇理由只佔全球人口4％美國人，用去全球28％石油產量；只要美國人慳一D，石油危機立即解決。
G7或集體干預美元
　　7月7日至9日G7財長日本北海道溫莎酒店開會，到時有冇良方對付全球通脹？美元弱勢已成為眾矢之的。上月達拉斯聯儲銀行報告認為，2003至07年油價上升，其中60美元係美元弱勢造成（如冇美元弱勢，今天油價係80美元，唔係139美元一桶）。2000年9月G7會議認為歐羅太弱後，歐洲央行開始手支持歐羅價，至今差唔多八年矣，依家問題出美元太弱。今年4月俄羅斯舉行迷你G8會議上已提出，美國政府至今態度係「口惠而實不至」，直到上周四貝南奇態度才改變。今年4月1.602美元兌1歐羅係咪又係歷史？過去兩個月美元兌歐羅已回升4％。大摩Jen提醒投資者，小心美元價突然轉強，並唔排除出現G7集體干預美元價行動。
　　日本北海道溫莎酒店上月我老曹剛剛去過，山上望落景色十分優美，住度有D與世無爭感覺。G7財長7月7日在此開會決定美元未來命運，好合適。美元2001年起減息，2002年起因美元轉弱，帶動美股上升；美股牛市2007年10月結束，隨之而來係加息周期及美元強勢？
　　2005年至今美國汽油價格上升120％，歐洲汽油價格只升40％（因兩地汽油稅率唔同，以及美元兌歐羅大幅貶值）。
　　1973年10月油價見3.01美元一桶，石油危機後一下子提升到10.65美元一桶，上升二點五倍，令1974年美國工業生產下降14％，日本工業生產下降20％以上。1974年香港經濟更係愁雲慘霧。
　　第二次石油危機係伊朗皇朝結束，新成立政府與美國為敵。油價由1979年13美元一桶猛增至1980年45美元，升幅亦係二點四六倍。經過一番爭持後，1981至82年亦導致西方經濟面對一次全面衰退。
　　1990年8月初海灣戰爭，令油價一度急升至42美元一桶，美國為首聯軍將伊拉克軍隊由科威特趕回老家，油價又再回落。呢次叫做經濟軟陸（美國只出現一季GDP負增長）。
　　今年5月油價一度見139美元一桶，由於美國、歐洲、日本等國家經濟已改為以服務業為主，受油價影響唔及八十年代，更加不及1973至74年；但對中國同印度家仲係工業大國，所受影響便十分大，依家兩大國都以補助油價形式捱落去。隨住油價一升再升，擔心印度就快支持唔住，如印度股市14500點失守，代表麻煩開始，各位宜小心。
　　內地5月份CPI上升7.7％，表面上較4月份8.5％回落（前四個月CPI升幅分別為7.1％、8.7％、8.3％、8.5％），CPI升幅係咪見頂？答案係否定。因為除鮮菜價格下降15.7％外，唔少物價漲唔起理由係行政指令，例如汽油（貨車已大排長龍）、電費等等。如讓電費、汽油價格上升，5月份CPI升幅唔係7.7％而係9.2％！此乃近日人行急急將存款準備金率一下子調高一個百分點底因。
人行急急加存款準備金率有因　　5月19日越南央行將基準利率上調3.75厘至12厘；6月10日再加息2厘到14厘。越南境內銀行如Nam A Bank打出越南盾一年定期存款利率16.32厘、美元存款利率一年期7.6厘，但存款櫃位仍然冷清清；反之，豐越南河內分行打出美元一年期存款利率3.7厘，卻有相當多客戶。點解越南居民唔到當地銀行Nam A Bank收取7.6厘息，反而將蚊年存入豐越南收3.7厘？點解越南盾高達16.32厘，仍然咁少人存錢？存款利率咁高，越南企業要畀幾多利率才借到錢？又有幾多企業支付20厘以上利息後仍可賺到錢？事實上，唔少越南企業已唔敢貸款，寧可唔做生意……。
　　中國人民幣貸款利率唔高，但存款準備金率升到17.5％後，進入「冇錢借」期。呢段冇錢借日子維持得愈耐，對經濟壓力愈大。香港1973至74年情況令否內地重演？
　　七十年代出現西方國家滯脹（stagflation），依家似乎中國同印度上演；反而美國同歐洲最大憂慮係GDP進入極低增長期（類似九十年代日本）。中國GDP仍有雙位數字升幅，但CPI升幅亦十分大，今年5月份7.7％，係一年前3.6％一倍以上（今年首五個月CPI升幅係過去九年半以來最大）。同九十年代初期中國CPI上升唔同，當時係開放物價管制加人民幣大幅貶值結果，令1994年10月CPI升幅一度達14.5％惡性通脹。依家人民幣在升值，物價大部分由市場決定，現今CPI大幅上升並非單純食物同能源價格推動，而係勞工短缺下工資大幅上升結果，情況同七十年代西方國家十分相似，係結構性通脹，唔係供應短缺通脹。結構性通脹好頑固，唔易對付也（工資與物價之間互相追逐，結果令CPI一升再升）！

<<轉載自信報>>