陸 羽 仁 (04/02/2008): 利息低風險高的年代

美國次按危機愈爆愈深，聯儲局被逼在一個月內減息共1.25厘救災，借貸利息減到3厘，香港銀行無跟到足，只減息0.25厘，跟減跟得唔夠多，仲搞到地產股有少少回吐。銀行做生意賺息差，假如借錢是最優惠利率減3厘計，減息後最優惠利率為6厘，減3厘即係得番3厘，而大額存款減息後只得0.5厘，即是賺2.5厘息差。本地銀行今次不能跟足美國減0.5厘，不是貸款利息不能減，而是存款利息可減的空間有限，現時存款減到0.5厘已好難吸引到人存錢，若跟美國減足0.5厘，即係得番0.25厘，貸款勢將流失，而且美國還會減息，咁下次又點跟呢？
陸羽仁上周五收到美資銀行一位銷售小姐的電話，話轉入40萬新錢去她的銀行做大額存款，又高利息又有禮送，我對存錢入銀行做定期向來無興趣，但好奇問銀行小姐，你過去一向只當100萬元係大額存款，為何今次40萬都殺，銀行小姐支吾以對。我估在美國減息潮中，減到太離譜時，亦會對本地銀行營運構成各種問題，其中一個問題係存款流失。
「I kill you later」
香港早已進入實質負利率年代，銀行大額存款得0.5厘息，美國再減息，恐怕會跌到0.25厘，得番個零頭，等如無息畀你，但通脹起碼3%，即係話以現時利息計，存錢在銀行扣除通脹，一年實質貶值2.5%。
負利率逼人投資，但投資存在風險，不妨一一講。第一種是潮流時興投資的「高息」產品。這些「高息」產品名目繁多，主要針對投資者「好息」心態，例如證券掛存款，又例如累積性投資合約（Accumulator），在這個跌市中，Accumulator大出風頭，甚至被指為股票大跌的元兇之一，俾人改出個花名做「I kill you later」，話佢在跌市殺死好多人。
很多人聽過累積投資合約個大名，實際上唔知佢做乜，舉一個例，國壽（2628）[股價及相關新聞] 股價50元的時候，做一份累積投資合約，年期一年，接貨價為85%，即係42.5元，即係一年內按42.5元的水平每一日接少量貨，若國壽股價不變，日日可以接到平貨，就日日賺錢。這些產品規定股價跌到某一水平就雙倍收貨，例如正股跌到接貨價42.5元時，就要雙倍接貨，平時每日接100股，到那時就要接200股。這些產品都會有一個「踢走價」，例如正股升到比訂價高5％，此例子就是52.5元，整個合約就會被中止。
你而家會問，這些累積投資合約咁老襯，升時被人踢走，跌時雙倍接貨，點解仲有人做？你先要回想去年股市不斷上升時，你做一份累積投資合約，不斷低價接貨，即使做了一兩個月就被人踢走，都接了一兩個月平貨；被人踢走後商人銀行又會慫恿你在高價再做，但正股一升，每做一份新合約都賺錢，自然冇乜防備心了。
到股市一路插，做了累積投資合約就好慘，一路要接貴貨，仲要打孖上，要斬倉成本好重，一路接貨亦好肉痛，你想像國壽跌穿30元時，仍要每天接42.5元的國壽，種感受幾惡頂。到頂唔順時，就被人斬倉，所以有大量紅色股平貨不問價掟出貨，和這些衍生投資工具絕對有關。
另外有些股票掛證券（ELI）亦差不多，又用國壽例子，在國壽50元時，你存一筆錢，銀行付30厘息，但要在到期時以現價85%接國壽貨，即係隨時國壽跌到28元時，做了ELI就要一筆接42.5元作價的貨，一接貨已經唔見了近30%，隨時一接貨就斬倉。
高息產品如沽期權
這些所謂「高息產品」，接貨者實質上沽出了「認沽期權」，要承受無限風險，若股價跌了，對手就有權大手沽貨給你。而且「不公平」的地方是跌時無限風險，升時卻只有有限收益，因為上方會有一個踢走價，一升就把你踢走，做一個兩年合約，在升市時收高息接平貨的日子只得三幾個月，衰起上來接貴貨卻要接足全程。
我亦試過有個銀行小姐打電話來推銷這些累積投資合約，我好認真咁問佢：「你銀行都係賺手續費，個市咁高，做呢累積投資合約風險好高，我想做沽家又得唔得呢？我照樣畀手續費你賺又如何？」銀行小姐唔好意思咁對我說：「對唔住呀，呢合約主要由大型金融機構做莊沽出，你普通人無得做！」
做這些高息產品，小心利大本無歸，你要對自己的財力和對那些掛股票有好深的了解，要知道那些股票可能回調的深度，要知道自己財力頂得順，要知道你不幸要接貨時，自己有能力坐貨，而那隻股票坐兩三年可以回到你的「折扣買入價」，才好去做。
炒匯亦有風險
第二種風險投資是買外幣。最近富豪叫人買澳元，話收7厘息加7%升值，一年回報有14%咁話。美元勢弱，而且未來還會再減息，真係無乜人會睇好美元，大多數人估佢即使唔跌，亦有反彈無升幅。
一般人投資信權威，聽到話澳元一年賺14%就身上，甚至用5%按金大炒桿槓外匯。但今年底美國民主黨好可能上台，上台會從伊拉克撤兵，會控制預算赤字，美元弱到咁上下時，亦有可能轉勢，外幣可以買可以炒，但不明白存在美元轉勢的風險，同樣要定止蝕，最好等美元反彈、澳元回軟時才買，同時定番10%止蝕，咁就比較安全。李四叔投資雖精，但唔會隨匯市變化日日向你報料，佢見到有危險時會走，你就要靠自己決定買唔買，幾時走。
另一種可以考慮的貨幣是人民幣，人民幣存款利息比港元存款高，但若美元轉勢，也一樣有風險，但波動肯定無其他自由浮動的高息貨幣那麼大，若大家睇好中國經濟，長線人民幣幣值都係向上，都唔怕用少少錢買人民幣。
第三種風險投資係買股票。港股從高位近32,000點下插，上月最低見過21,700點，好多人會問見底未？若單從恒指的調整幅度看，以低位計已經調整得夠，特別是雪災令國指調整得更深，現價開始進入吸引的水平。不過現時港股的主要風險不在自身，而在美國，若美國經濟失救，進入漫長的衰退中，港股就低處未算低。
對美國經濟的走勢，存在兩種意見，唱好派主要是美資大行，認為在聯儲局大減息和政府大救市下，美國正渡過最壞時候，預期第二季、第三季會輕微衰退，到第四季又回復增長，換言之美國只有短暫危機，並無重大風險。
唱衰派以大炒家索羅斯為首，認為美國正步入重大危機，已經無得救，過去聯儲局獨沽一味減息救市，如今做得更盡，美國大放水喉派錢，救得一時救唔到一世，美元正步向崩潰。說得白一點，索羅斯正大笑聯儲局主席伯南克無能。
無論美資大行或索羅斯，他們都有重大利益，美資大行等伯南克放水救自己，自然唱好，索羅斯肯定狂沽了美元，所以唱淡。對兩方觀點都打一些折扣後，可以咁講，次按問題和樓市下滑令美國經濟面對空前風險，政府和聯儲局亦正全力救市，救唔救得到要再觀察。有債市專話，次按危機令債券市場近乎停頓，大家連價都唔想開，但聯儲局連番大減息，令市場的債券吸引力增加，只要市場願意重新開價，即使開價較低，也能令債市重新動起來，就不致令信貸緊縮不斷惡化。
買電力股收息
美國經濟景未明，美股仍在反彈，可能再彈一段，到月中過後，觀望下月聯儲局的議息動向，以及歐洲銀行公佈的業績，美股彈完可能又回吐，估計港股都有先彈後回的走勢，唔係一條直線向上。
現時股票比較吸引，問題就要睇你有無閒錢，要唔怕萬一大跌時，自己也守得住，才好去買股。以內地電力股為例，在宏調影響下，例如華能（902）[股價及相關新聞] ，差不多跌近上一浪的起步位，而且華能的派息一定高過存錢在銀行的利息，即使大陸爆股災，股價大插，但經濟發展始終有電力需求，電力股跌完始終會升番，係睇長線的選擇，可以候低買少少。
投資往往有風險，不是有風險就不去投資，要明白風險所在，要控制風險，不去冒不合理的風險。

<<轉載自香港經濟日報>>