陸 羽 仁 - 金 融 High Tea (21/11/2008): 美股變形撈唔過

美股杜指早一日暴跌427點，8000點大關終告失守，港股跟隨外圍跌勢，恒指大幅低開645點，之後在低位窄幅橫行，中午收報12,111點，跌 704點，下午恒指續跌，最低曾跌穿12,000點，見11,977點，跌839點。尾市反彈，跌幅收窄，以全日最高位收市，恒指收市報12,298點， 下跌517點，跌幅4%；國企指數收市報6,191點，下滑298點，跌幅4.6%，全日成交446億元。期指收市報12,197點，下跌434點，低水 101點。

藍籌股除了長實(001)一枝獨秀，先跌6%，後逆市上升0.5%外，所有股票均隨大市下挫。龍頭股滙控(005)前日除淨上升後，昨日被拋售，收市報 75.6元，下挫4.6%，推動大市向下，中移動(941)表現比滙控優勝，收市報65.5元，只下跌1%，跑贏大市。

花旗跌到爆煲價

經濟唔好，本地地產股跑輸大市，成為跌市重災區。除長實上升外，恒地(012)跌2.9%、新地(016)跌5%、信置(083)跌8%、恒隆地產 (101)跌8.91%、新世界發展(017)下滑9.5%；收租股九倉(004)大跌12.8%，顯示市場睇淡租務市場。

在亞洲區內，香港股市唔多唔少，表現較好的是內地股市，上證綜合指數收報1,983點，跌33點或1.7%。日股由於日圓偏強不利出口，跌得較甘，大跌6.9%。

在美股大跌400幾點的形勢下，港股昨日唔算跌得多，睇番美股上一日就真係相當肉酸，上一日杜指低收7997點，係收市低位，但已經好接近10月10日杜指日中低位是7882點，美股今次已經第三次試底，若不能大幅反彈，就要破位向下，展開一浪深跌。

熟悉美股情況的中環茶友話，美股出現險情，和總統交接有關，新總統奧巴馬要明年1月才上任，距今仲有兩個月，現總統布殊已經唔係太想做嘢，以7000億美 元的救市資金為例，第一批2500億好快用完，布殊和財長保爾森唔想再用。所以而家美國三大汽車廠水乾，布殊政府都唔想救。

未跌完暫時忍手

有個炒開美股的本地大孖沙話，美國金融業個黑洞都唔知幾大，早前AIG出事，話要政府出850億美金入股去救，後來不斷要追加，如今美國政府已注入 1500億美元。上一日花旗股價跌到阿媽都唔認得，單日跌了23.4%，跌到6.4美元，市值只有348億美元，咁跌法因為傳出花旗會購回資產，市場估佢 會出事，雖然出事美國政府一定會救(特別香港存戶不用擔心，因為存款已由香港政府包底)，但股東就有理由擔心了，不安情緒仲拖累到UBS股價在歐洲亦大 跌。早前華盛頓互惠銀行出事有850億美元要撇，花旗大佢咁多倍，隨時要撇2000億，3000億美元，如果政府要注咁多錢入去，你話現有股東的股份會攤 薄到乜嘢田地？

保爾森早前改口話唔再買銀行的壞資產，只會入股銀行，或有難言之隱，佢第一期救市基金2500億已用咗一半，若一家銀行都有數以千計的爛資產，佢邊夠錢全面去買，美國金融股的黑洞極大，保爾森行落水才知道水好深。

花旗呢間曾經是世界最大的銀行，如今市值跌到348億美元，跌到變晒型，變成美國第五大銀行，以前講出來都無人信，舊時花旗一次集資都集300幾億美金， 如今跌到咁，即係股票價值已大量蒸發掉。在2007年年頭，花旗每股還有50多、60美元，如今得番6.4美元，真講誇張都極。

不過股壇大孖沙話，千祈唔好以為花旗股價平，就走去撈貨，如今佢已進入極高風險的狀況，若最後要政府入股，現有股份唔知會跌成點。跌咗九成的股份，可以再 跌九成。總體來說，大孖沙唔睇好近期美股走勢，若然係咁，本地股市短期都唔慌會好，有心買貨者唔使急，唔試底真係要忍手。

現時港股無嘢好炒，有時跟吓內地消息炒，但係都比較短癮。前一日話有消息指內地新的成品油價格機制可能在20日內公佈，有利石化股，所以油股前日炒咗一 轉。昨日又有內地傳媒透露，若落實徵收燃油稅，稅率在30%至50%之間，有機會與成品油價格調整一齊推出，或會令成品油價格高於現時油價。燃油稅或會參 考已實施燃油附加費措施的海南省，以30%的燃油稅率計算，油價每升可能增加50分人民幣。石化概念好快就炒完，上日急升的中石油(857)及中石化 (386)昨天跟隨大市回落4.3%及3.6%，更貼近油價走勢的中海油(883)更下跌6.3%。

<<轉載自頭條日報>>