陸 羽 仁 - 金 融 High Tea (16/01/2009): 狂轟濫炸屠殺好友

昨日係「好友屠殺日」，美股杜指上日急插248點至六個星期低位，亞太區股市跟隨全 線下跌，而且跌幅驚人，大部份跌至一個月以來的低位、南韓更是今年首次跌到要停市五分鐘。港股自不能倖免，恒指早市低開569點後快速尋底，跌穿 13,000點大關，最低曾跌至12,904，大跌801點，之後跌幅略為收窄，半日收報12,967點，仍跌737點。下午叫做唞吓氣，尾市一度反彈至 13,301點。

恒指收市報13,243點，下瀉462點或3.4%；不過現貨收市期指又插，期指收報13,051點，跌656點，比現貨大幅低水192點，成交 80511張。國企指數雖然下跌，但繼續跑贏大市，收報7,042點，跌177點或2.5%。大市成交662億元，當中包括蘇皇配售中行(3988)股份 上板的185億元。

期指再插仲未埋尾

中環茶友睇住大戶做?話佢哋今次係打咗場漂亮嘅勝仗(散戶當然好唔啱聽)。

茶友用打仗睇形容，大戶利用「新年效應」，製造恍似「牛市」形勢作誘餌，引誘好友入市，好友食到少少甜頭全軍盡出，點知俾人殺番轉頭不特止，再來一個圍城。

茶友話，大戶將好友困喺一個無險可守的小城裏面，狂攻猛打，可以講係為所欲為。借住滙控(005)的弱勢，大市連續六日狂「隊」之後，前日連去年12月 24 日的近期低位13,855點都殺穿埋，最後一度防線都被擊破，仲未投降嘅死硬派好友，已經被殺到崖邊，期指大戶食住2000點在手，隨時可以食胡。茶友 話，依家睇嚟大戶唔止想食三番、係要食爆棚。

結果昨日大戶展開全面攻擊，期指一開就打到13,000點門口，好友火力強橫，好似最近以色列用巨型轟炸機針對加沙一樣，狂轟濫炸，屠殺好友，茶友話，好友可以講係全軍覆沒，佢見到好多散家期指好倉全部斬晒。

圍城攻破，好友死得八八九九，大戶殺多一兩日就可以收兵，但昨日尾市期指仲插，再跌多啲都唔奇，大戶實行汁都撈埋。月尾時不排除跌得多會彈番，但綜觀外圍 經濟環境，整體市道仍是以「淡勢」為主，大家切勿將反彈睇成轉勢。大戶呢一仗當然又係「環亞洲操作」，叻就叻在美國其實並無大事，但年頭亞洲市抽又抽得高 過人，如今回又回得急過人，借住美國小波浪，在亞洲玩大波浪。

昨日拖低大市的主要動力是重磅股滙控和中移動(941)，夾住大股來隊。滙控受大摩削減目標價至52元，上日在美國預託證已急跌8%，昨日整日備受沽壓， 最低跌至65.55元，係10年以來的新低，尾市略為回穩，但仍下跌5.7%至 66元；中移動最多亦跌過半成至68.6元，但里昂睇好中移動，並維持中移動「跑贏大市」評級，目標價85元，尾市跌幅收窄，收市重回70元樓上，報 70.4元，跌3.3%。

睇淡滙控阿 媽唔信

好多散戶唔順大摩唱淡滙控，一見滙控跌就撲埋去，有自稱「反買滙控派」的中環茶友，就叫散戶留神，佢話大行出報告或有動機，但唔好唔信大行枝笛走去頂頸， 否則要吃眼前虧。呢個茶友過去經常叫人唔好買滙控，佢唱淡理由不是有甚麼過人眼光，能夠睇穿滙控盤數或前景，而係見到美國金融業瓦解，形成資金黑洞，先係 中東股神、繼而係各國主權基金，先後都入股美國的銀行都變「填氹」，跟住輪到美國政府出手，入股金融機構都救到身水身汗，咁樣環境，點解仲要企埋去呢？所 謂君子不立危牆下，美國金融業不但係牆倒，直情係地陷，梗係無理仲去買以美英為主要市場的跨國金融股！摩根大通同美銀都咁便宜，滙控都唔會好環境。

不過，呢個茶友有個慘痛經驗，就係發現身邊好多至愛親朋，包括母親大人都無聽佢講，偷偷去買大笨象，主要原因之係人是會累積經驗的動物，過去幾十年買滙控 係「有買貴、無買錯」，每次係低位吸納滙控，都有可觀利潤，今次滙控由100元樓上開始回落，好多散戶都視為「低吸」良機，於是紛紛入疊，形成過去一年基 金猛沽貨，散戶猛接貨的現象；加上散戶貪滙控派息高，話現價10.9厘息率好吸引。但茶友對阿媽的忠告，滙控係可以不斷跌、可以減派息、可以供股集資，今 日的滙控同往日唔同，阿媽唔好唔信鏡呀！

<<轉載自頭條日報>>